Колумбиянинг Богота шаҳрида оғир атлетика бўйича “Париж-2024” Олимпия ўйинларига илк рейтинг очколарини тақдим этадиган жаҳон чемпионати баҳслари қизғин паллага кириб бормоқда.

Жаҳон чемпионатига дунёнинг барча етакчи оғир атлетикачилари жам бўлган. Жумладан, Токио олимпиадасининг ғолиб ва совриндорлари, “Рио-2016” олимпиадасининг 3 нафар ғолиби, 15 нафардан зиёд жаҳон чемпионлари, дунёнинг ўнлаб рекордчилари қатнашмоқда.  

Мусобақада фақат Олимпия ўйинларининг уч карра ғолиби бўлган хитойлик Лу Сяоцзюн иштирок этмаяпти.  

Чемпионатнинг бешинчи куни ортда қолди. Шиддатли баҳслар натижасига кўра, ҳамюртларимиздан аёллар ўртасида Нигора Абдуллаева 55 килограмм оғирликда дунёнинг энг кучли оғир атлетикачилари орасида 6-ўриндан, 67 килограммда кураш олиб борган Достон Ёқубов 8-поғонадан, 81 килограммда баҳсларда қатнашган Муҳаммадқодир Тоштемиров еттинчи, Оғабек Тўхтаев ўн биринчи ўринлардан жой олди.  

Эртага, 13 декабрь куни ўтадиган баҳсларда Шарофиддин Амриддинов Богота супачасига кўтарилади.  

Шунингдек, 15 декабрдаги мусобақаларда Ригина Адашбоева ва Турсуной Жабборова, 16 декабрь куни кечадиган медаллар учун курашларда Олимпия ўйинларининг ғолиблари Руслан Нуруддинов ва Акбар Жўраев қатнашади.  

 

Тўлқин Рўзиев,  

ЎзА