Коррупцияга қарши курашишда, айниқса, бу иллатнинг олдини олишда бутун дунёда очиқлик тамойилига амал қилишга ҳаракат қилинади. Айниқса, демократик жиҳатдан ривожланган давлатларда давлат хизматчилари, хусусан, мансабдор шахслар фаолияти, даромадлари омма учун очиқ.

Мансабдор шахс ёки давлат хизматчиси қанча даромад олади ва қанча маблағ сарфлайди, деган масала жамоатчилик, ОАВ эътиборида бўлади. Расман олаётган даромадидан кўпроқ маблағ сарфлаган мансабдор ортиқча пулни қаердан олгани савол остига олинади.  

АҚШнинг  “Boston Globe” газетаси бош муҳаррири Рашел Коен иштирокида Тошкентда ўтказилган тренингда шу ҳақда гап борди.  

Р.Коен юқоридаги масала АҚШда журналистларнинг доимий эътиборида бўлиши, ана шундай суриштирув ишлари туфайли  коррупциявий жиноятлар фош этилгани ҳақидаги фикрлари билан ўртоқлашди.

Мазкур тренинг Коррупцияга қарши курашиш агентлиги томонидан “Минтақавий мулоқот” (Словения) халқаро нодавлат ташкилоти  билан ҳамкорликда ташкил этилди.  

Унда давлат ташкилотлари матбуот котиблари, журналист ва блогерлар, нодавлат нотижорат ташкилотлар вакиллари, жамоатчилик фаоллари иштирок этди.  

Тренинг орқали коррупцияга қарши курашиш жараёнларига давлат органлари ва ташкилотлари, шунингдек, фуқаролик жамияти институтлари, хусусан, ОАВ, ННТ вакилларини кенг жалб қилиш, соҳадаги ислоҳотлар ижросини таъминлашда уларнинг иштирокини кучайтириш ва фаоллигини ошириш, шунингдек, бу йўналишда ўзаро ҳамкорлик алоқаларини янада мустаҳкамлаш  мақсад қилинган.  

“Давлат органларининг шаффофлигини таъминлаш ҳамда коррупцияга қарши курашишда ОАВ ва ННТларнинг роли” мавзусида ўтказилган тренингда мазкур тузилмалар коррупцияга қарши курашишда жамоатчилик назоратини амалга ошириши зарурлигига эътибор қаратилди.  

Очиқлик ва шаффофликни таъминлашда улар самарали куч ва имкониятларга эга. Шу боис бугунги глобаллашув шароитида уларнинг бу борадаги салоҳияти ва тажрибасини кучайтиришга қаратилган стратегияларни ишлаб чиқиш, илғор тажрибаларни оммалаштириш тобора муҳим аҳамият касб этмоқда.  

Шу нуқтаи назардан тренингда коррупцияга қарши курашиш бўйича ташаббусларни илгари суриш ва бунда шаффофлик, ҳисобдорликни таъминлаш, ННТларнинг коррупцияга қарши курашишдаги салоҳияти ва тажрибасини кучайтиришга қаратилган стратегиялар ҳақида сўз юритилди.  

Халқаро ва трансчегаравий ҳамкорликни амалга ошириш масалалари, шунингдек, коррупциявий ҳолатларни аниқлашда журналистик суриштирувнинг ўрни, ОАВ ва интернет орқали коррупциянинг олдини олиш ва ҳалолликни шакллантиришда ўзига хос механизмлар юзасидан батафсил маълумот берилди.  

Рашел Коен медиа вакиллари билан коррупцияга оид материаллар тайёрлашда маълумотлар тўплаш, улардан фойдаланиш, таҳлил қилиш ва жамоатчиликка тақдим этишда қонунчилик  талаблари  ва касб этикасига риоя этиш борасида ўз тажрибаси ҳақида сўзлаб берди.  

Давлат идора ва ташкилотлари матбуот котиблари учун ташкил этилган “Коррупцияга нисбатан муросасизлик кайфияти ва коррупцияга оид инфомуҳитни шакллантиришда давлат органлари матбуот хизматларининг ўрни” мавзусида бўлиб ўтган тренингда эса аҳолида коррупцияга қарши муросасиз муносабатни шакллантириш, коррупцияга қарши чоралар тўғрисидаги хабарларни жамоатчиликка самарали етказиш стратегиялари кўриб чиқилди.

Матбуот котиблари хорижлик мутахассисдан матбуот хизматларининг коррупцияни фош этиш ва бартараф этиш борасидаги ҳаракатларида шаффофликни таъминлаш, фуқаролик жамияти институтлари ва ОАВ билан коррупцияга нисбатан муросасизликни тарғиб қилиш бўйича ҳамкорлик масалаларида ўзларини қизиқтирган саволларга жавоб олди.

Агентлик ҳамда давлат органлари, оммавий ахборот воситалари, нодавлат нотижорат ташкилотларининг ўзаро ҳамкорлик механизмларини кучайтириш чоралари ҳам тадбирда атрофлича муҳокама этилди.

Мазкур масалада иштирокчилар томонидан бир қатор таклифлар илгари сурилди. Унга кўра, бу каби тренингларни кўпроқ амалий фаолият билан боғлиқ машғулотлар орқали мунтазам ташкил этиш, айни йўналишга қизиқувчи журналист ва блогерлар доирасини кенгайтириш, улар билан доимий мулоқотлар ўтказишга келишиб олинди.  

Н.Абдураимова, ЎзА