Нью-Деҳлидаги меҳмонхонада Марказий Осиёдан келган сайёҳлар ҳалок бўлди
Ҳиндистон пойтахти Нью-Деҳли шаҳрининг Малвия Нагар туманида жойлашган меҳмонхонада чоршанба куни эрталаб йирик ёнғин содир бўлди. Бу ҳақда “India Today” нашри хабар бермоқда. Расмий маълумотларга кўра, ҳодиса оқибатида камида 21 киши ҳалок бўлган, 40 нафардан ортиқ инсон эса қутқарувчилар томонидан хавфсиз жойга эвакуация қилинган. Бинони қалин тутун қоплагани сабабли ичкарида бўлганлар орасида катта саросима юзага келган. Фожиа содир бўлган “Flourish Stay B&B” меҳмонхонаси Деҳли ҳукумати томонидан амалга оширилаётган махсус дастур доирасида расмий лицензия асосида фаолият юритиб келган.
“PTI” ахборот агентлигининг хабар беришича, ҳалок бўлганларнинг бир қисми чет эл фуқаролари бўлиб, улар асосан Марказий Осиё ва Африка давлатларидан келган сайёҳлардир. Жароҳатланганларнинг айримлари шифохонада оғир аҳволда қолмоқда. Шу боис қурбонлар сони яна ортиши мумкинлиги таъкидланмоқда.
Воқеа жойидан олинган тасвирларда икки нафар аёл аланга ва қоп-қора тутундан қутулиш мақсадида бино юқори қаватидан пастга сакрагани акс этган. Уларнинг ҳозирги соғлиғи ва аҳволи ҳақида аниқ маълумот берилмаган. Ҳуқуқ-тартибот идоралари ёнғин келиб чиқиш сабабларини аниқлаш бўйича тергов ҳаракатларини бошлаган.
Ф.Яхшибоева, ЎзА
