Нодирбек Ёқуббоев “Freestyle Friday” турнирида ғолибликка эришди
Истеъдодли шахматчимиз Нодирбек Ёқуббоев ҳар ҳафтанинг жума куни онлайн тарзда ташкил этиладиган “Freestyle Friday Championship” саралаш турнирида ғолибликни қўлга киритди.
Мазкур турнирнинг икки ҳафта муқаддам ўтказилган баҳсида Ёқуббоев Магнус Карлсен, Аржун Эригаиси, Ян Непомняший, Винсент Каймер сингари номдорлар билан куч синашиб, 9 очко билан 2-ўринни эгаллаган эди.
Бу сафар дастурга биноан ўтган 11 та турда 9,5 очко тўплаб, якка пешқадам сифатида мусобақани биринчи ўринда якунлади ва 400 АҚШ доллари миқдоридаги пул мукофотини қўлга киритди.
Айтиш лозим, мазкур чемпионатнинг саралаш мусобақалари ҳар ҳафтанинг жума куни бўлиб ўтади. Мавсум давомида тўплаган баллари ҳолатида кучлилар қаторидан жой олган 7 нафар шахматчи “Freestyle Friday Championship” чемпионатининг плей-офф босқичига йўл олади.
Кеча ўтган “Freestyle Friday Championship”нинг навбатдаги босқичида Нодирбек Ёқуббоев дунёнинг энг кучли гроссмейстерлари саналган Ян Непомняший, Ҳанс Нейманн, Гата Камский сингари номдорлар устидан ғалабага эришди.
Т.Рўзиев,
ЎзА
