“Nipah” вирусига қарши ишлаб чиқарилган янги вакцинанинг илк клиник синови Бельгияда бошланади. Токио университети олимлари томонидан яратилган препарат энди инсонда синаб кўрилади. Бу ҳақда “Nikkei” газетаси хабар берди.
Аввалроқ маймунда ўтказилган тадқиқот давомида вакцина вирусга қарши тўлиқ ҳимоя тизими билан таъминлангани аниқланди. Мутахассислар келгуси йил Бангладешда ёши улуғлар ва болалар иштирокида қўшимча клиник тадқиқот ўтказишни режалаштирмоқда.
Маълумки, “Nipah” одамга жонивор, жумладан кўршапалак ва чўчқадан юқиши мумкин. Ушбу вирус нафас олиш тизимини зарарлайди ва оғир ҳолатида энцефалит – бош мия тўқимасини яллиғлантиради. Ўз вақтида тиббий ёрдам кўрсатилмаса, ушбу касаллик 75 фоиз ҳолатда ўлим билан тугайди. Дастлабки белгилар вирус юққандан 4-7 кун ўтиб намоён бўлади.
Жорий йил январь ойида Ҳиндистоннинг Калькутта шаҳри яқинида “Nipah” тарқалиши илк бор қайд этилган. Ҳозир беш киши ушбу зараркунандани юқтиргани аниқланган, юзга яқин одам карантинга олинган.
Шу пайтгача “Nipah” вирусига қарши махсус дори воситаси ёки тасдиқланган вакцина йўқ эди. Шу боис мазкур препарат яратилиши тиббиёт соҳасидаги муҳим ютуқ сифатида баҳоланмоқда.
Ф.Яхшибоева, ЎзА