Нетаньяху нега БААга яширинча учиб борди? (+видео)
ВВС ёзишича, якшанба куни Исроил Бош вазири БААга яширинча учиб бориб Президент Муҳаммад бин Зоид билан учрашгани айтилмоқда. Бу ташриф Бирлашган Араб Амирликлари раҳбари Нетаньяхуни тахминан бир ярим ҳафта олдин Исроилда ҲАМАС ҳужуми таҳдидидан огоҳлантиргани тўғрисидаги хабарлар сабаб жанжал авж олаётган бир пайт амалга оширилган.
Сафардан кўзланган асосий мақсад ушбу хабарларни инкор эттириш бўлгани хусусида Исроил ОАВ ва “Associated Press” агентлиги ҳам ёзди. Американинг “Wall Street Journal” нашри ҳужумдан атиги бир неча кун олдин турли манбалар, жумладан Миср разведка хизмати собиқ раҳбаридан ҳам бир неча бор огоҳлантириш келганини қайд этган. Нетаньяху идораси эса ҳужум тайёрланаётгани бўйича бирор канал орқали огоҳликка чорланганини бошдан қатъий рад этиб келмоқда.
Нетаньяху ҳақиқатан БАА Президентидан ушбу маълумот инкор этилишини сўраган-сўрамагани аниқ маълум эмас. Фақат исроиллик сиёсатшунослар бундай қадамни Исроилда яқинлашаётган парламент сайлови билан боғлиқ ҳолда тушуниш мумкинлигини таъкидламоқда. Зеро, мазкур жанжалсиз ҳам сайлов амалдаги ҳукумат етакчиси учун жуда мураккаб кечиши кутиляпти.
Эртасига БАА Ташқи ишлар вазирлиги Нетаньяху билан учрашув тшғрисидаги ахборотга изоҳ беришдан бош тортган. Шу билан бирга Исроил билан “очиқ ва бевосита алоқа йўллари” сақланиб қолаётгани, ушбу давлатга “ҳар қандай муҳим разведка маълумоти” етказиб турилиши маълум қилинган.
Бош вазир идораси БААга ташриф ва кўзланган мақсадга изоҳ бермади. Нетаньяху ижтимоий тармоқда ҲАМАС босқинидан олдин Миср разведкаси раҳбари билан мулоқот қилгани хусусида тарқалган хабарларни ҳам инкор этди.
Кенжа Бекжонов, Улуғбек Тўхтаев (видео), ЎзА
