Агар Москва ва Киев оташкесим ҳақида келишувга эришса, Германия қуролли кучлари ҳарбийларини Украинага тинчликни таъминлаш мақсадида юбориши мумкин.

Бу ҳақда ГФР парламенти — Бундестагнинг мудофаа масалалари бўйича қўмитаси раҳбари Томас Рёвекамп маълум қилди. Бироқ Германиядаги бир қатор сиёсатчилар бу ташаббусга қарши чиқишмоқда, - деб хабар берди DW агентлиги.

Рёвекамп мамлакат қуролли кучлари Украина армиясини логистика, ҳарбийларни ўқитиш ва ҳаво мудофааси соҳасида қўллаб-қувватлаши мумкинлигини таъкидлаган. Унинг фикрича, Бундесверда Украинада узоқ муддатли тинчликни таъминлай оладиган ҳарбий имкониятлар мавжуд.

У шунингдек, тинчлик келишувида энг муҳим жиҳат – хавфсизлик кафолатлари эканини маълум қилди. 

– Европа ва АҚШ Украинага ҳарбий ҳимоя билан боғлиқ кафолатларни бериши керак, -деди у. – Агар Россия яна ҳарбий ҳаракатларни бошласа, Европа Қўшма Штатлар билан биргаликда ҳимояга тайёр туриши лозим.

Бошқа томондан, Саксония бош вазири Михаэль Кречмер Германия ҳарбийларининг Украинага жўнатилишини қоралаб чиқди.

Кречмернинг фикрича, ГФР Украина хавфсизлигини таъминлаш имкониятига эга эмас, чунки Бундесверда бунинг учун етарли салоҳият йўқ. У Европа хавфсизлиги учун АҚШ билан мустаҳкам ҳамкорлик тизимини йўлга қўйиш зарурлигини айтди.

Кречмер ва Рёвекамп ҳар иккиси ҳам бир партия аъзоси бўлиб, бу партия ҳозирги Германия ҳукуматида етакчилик қилмоқда. Ҳукумат коалициясининг бошқа аъзоси — Германия Социал-демократик партияси ҳам Бундесвернинг Украинада хавфсизликни таъминлашда иштирок этиши мумкинлиги борасида шубҳа билдирган.

ГФР мудофаа вазири Борис Писториус Берлиннинг Украинага хавфсизлик кафолатлари борасидаги иштироки ҳали ҳам муҳокамада эканини маълум қилди. Унинг таъкидлашича, Украинага немис аскарларининг жўнатилиши бўлажак музокараларга, қолаверса, хавфсизлик кафолатлари масаласида АҚШ ва Европадаги бошқа ҳамкорларнинг қандай қарор қабул қилишларига боғлиқ.

<iframe width="640" height="420" src="https://www.youtube.com/embed/m5KesJfsLqM" title="Nemis harbiylari Ukrainaga jo‘natilishi mumkin" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

                                                                      К.Бекжонов, ЎзА