Яқинда юртимизда бўлган хорижлик ҳамкасбимиз Ўзбекистонга қурилишлар мамлакати, деб таъриф берди. Дарҳақиқат, шундай. Бугун қайси жойида бўлманг, йирик қурилишлар, ободончилик гувоҳи бўласиз. Бу қурилиш материалларига бўлган эҳтиёжни оширди. Хусусан, гипсли қопламаларга.

Қўқон эркин иқтисодий зонасининг ўзида учта гипсли қоплама заводи ишлаб турибди. “BNBM” уларнинг бири. У хорижий сармоя асосидаги корхонадир.У дунёдаги гипсокартон ишлаб чиқарувчи энг йирик корхона томонидан таъсис этилган. Маълумот учун шуни айтиш лозимки, “BNBM” Хитойнинг қурилиш материаллари гуруҳининг янги яшил қурилиш материаллари саноати платформаси бўлиб, умумий 119 та маҳаллий ва хорижий саноат базасига эга. Уларнинг орасида гипсокартон ишлаб чиқариш қуввати 3,5 миллиард квадрат метрни ташкил этади ва бу дунёдаги энг йирик гипсокартон ҳамда метал профиллар ишлаб чиқариш корпорациясидир.

[gallery-19838]

Хўш, дунёнинг бунчалар номдор компанияси бизнес юритиш учун нега айнан Фарғона вилоятини танлади?

– Нега биз айнан Фарғона вилоятида бу заводни қурдик? Чунки вилоятда инвестиция учун имкониятлар қулай. Хомашё базаси етарли. Қўқон эркин иқтисодий зонасига эса имтиёзлар берилган, – деди “BNBM” хорижий корхонаси бош директори До Шанг Фенг.

“BNBM” компаниясининг янги заводи Ўзбекистонда гипсокартон ишлаб чиқариш саноатини янада яхшилашга ёрдам берди, шу билан бирга, компания янги иш ўринлари билан таъминлабгина қолмай, Фарғона вилоятининг иқтисодий ўсишига ва солиқ тушумларини оширишга ижобий ҳисса қўшди.

– Биз 2023 йил июнь ойида иш бошладик. Маҳсулот дарҳол ички ва ташқи бозордан жой топди. Бунинг сабаби сифат билан боғлиқ. Биз учун энг катта натижа бу – сифат, – дейди До Шанг Фенг. – Шу йилнинг 9 ойида 6 млн  квадрат метр гипс қопламасини экспорт қилдик. Ички бозорга эса 9 млн квадрат метр сотилди.

Ҳозир корхонада 170 нафар атрофдаги  қишлоқларнинг ёшлари ишламоқда. Уларнинг бири  Хуршида Норматовадир. У сифат назоратчиси. Хориж ва ички бозорга чиқёатган маҳсулот унинг кўригидан ўтгандан сўнггина махсус рухсатнома олади.

–Ишга кирганимга икки йил бўлди. Сифат инспектори бўлиб ишлайман, – дейди Хуршида Норматова. – Бизни бир йил давомида ўқитишди, назоратчиликка.  

“BNBM” хорижий корхонаси истиқболда янги маҳсулот ишлаб чиқариш ҳисобига кенгаяди.

– Яқин келажакда қуруқ клей, қуруқ сувоқ қоришмаси ва гипсокартонни қотирадиган метал профиллар ишлаб чиқаришни ҳам йўлга қўймоқчимиз, – дейди корхона раҳбари.

<iframe width="560" height="315" src="https://www.youtube.com/embed/VEJiSVyCr6Y?si=p-7okWN97I-o313w" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов(сурат,видео),

ЎзА мухбирлари