Ўзбекистон энергетика соҳасини доимий ривожлантириш ва замонавий технологияларни жорий этиш йўлида муҳим қадамларни босиб ўтмоқда.

“Навоий иссиқлик электр станцияси” акциядорлик жамиятида бунёд этилаётган 650 МВт қувватга эга 3-сонли буғ-газ қурилмаси бу борадаги муҳим лойиҳалардан бири ҳисобланади. У мамлакатимизнинг электр энергияси ишлаб чиқариш салоҳиятини ошириш, янги иш ўринлари яратиш ва хорижий инвестицияларни жалб қилиш орқали иқтисодий ўсишга ҳисса қўшиш мақсадида амалга оширилмоқда. 

Лойиҳа доирасида Япониянинг “Mitsubishi Corporation” ва “Mitsubishi Power Ltd.” компаниялари ҳамкорлик қилмоқда. Шунингдек, Туркиянинг “Çalik Enerji” компанияси ва Ўзбекистоннинг “Ўзбекэнерготаъмир” АЖ пудратчи сифатида иштирок этяпти. 

Айни чоғда қурилиш жараёнида 470 нафар мутахассис ишламоқда, уларнинг 420 нафари маҳаллий кадрлардан иборат. Шунингдек, 90 та махсус техника самарали фойдаланилмоқда. 

Лойиҳа 2026 йилнинг якунига қадар фойдаланишга топширилади. Қурилма ишга туширилгач, йилига қўшимча 4,8 миллиард киловатт-соат электр энергияси ва 932 Гкал иссиқлик энергияси ишлаб чиқарилади. Шу билан бирга, унда 347 та янги иш ўрни яратилади. 

Таъкидлаш керакки, мазкур станцияда қурилаётган буғ-газ қурилмаси мамлакатимизнинг энергетика салоҳиятини янада кучайтириш, замонавий технологияларни жорий этиш ва бандлик масаласида муҳим роль ўйнайди. Лойиҳа иқтисодий ўсишни рағбатлантириш ва ташқи ҳамкорликни кенгайтиришга ҳисса қўшиб, республиканинг энергетик инфратузилмасини ривожлантиришга катта имконият яратади. 

<iframe width="650" height="420" src="https://www.youtube.com/embed/eJdUwc3TE08" title="“Navoiy IES”da 650 megavattli bug‘-gaz qurilmasi bunyod etilmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Н.Зиёдуллаева, А.Аҳмедов (видео-монтаж), ЎзА