Бир гуруҳ депутатлар томонидан қонунчилик ташаббуси ҳуқуқи асосида ишлаб чиқилган — хавфсиз муҳитни яратиш ва ҳуқуқбузарликларнинг барвақт олдини олишга қаратилган қонун лойиҳаси иккинчи ўқишда қизғин муҳокама қилинди.
Мазкур лойиҳада кўзда тутилаётган нормалар бўйича Қонунчилик палатаси Халқаро ишлар, мудофаа ва хавфсизлик масалалари қўмитаси раиси У.Шерматов маълумот берди.
Таъкидланганидек, совуқ қуролни ёки совуқ қурол сифатида фойдаланилиши мумкин бўлган ашёларни қонунга хилоф равишда жамоат жойларида олиб юриш, ҳатто маъмурий жавобгарликка тортилгандан кейин ҳам олиб юриш ҳолатлари жамоат хавфсизлиги, фуқароларнинг тинч ҳаёти ва ҳуқуқий тартиботга жиддий хавф солиш эҳтимоли мавжуд. Лойиҳа билан бу каби ҳуқуқбузарликларни такроран содир этган шахсларга нисбатан жавобгарлик чоралари белгиланмоқда.
Шунингдек, оилавий (маиший) зўравонлик жиноятини содир этган шахсларга қурол олиш ҳуқуқини бермаслик ҳамда болаларга нисбатан зўравонлик содир этган шахсларда мавжуд қуролларни ички ишлар органлари томонидан вақтинча олиб қўйиш тартиби жорий этилмоқда.
Яна бир муҳим ўзгариш — наркологик касалликка чалинган шахсларни мажбурий даволаш тартиби билан боғлиқ бўлиб, қонун лойиҳасида бир марта маъмурий жавобгарликка тортилган, наркологик касалликка чалинган шахс ҳам суд қарори билан даволашга юборилиши мумкинлиги назарда тутиляпти. Наркологик экспертиза ўтказиш, наркологик экспертиза ўтказувчи тиббий комиссияларнинг фаолият юритиш тартибини белгилашга оид нормалар кенг муҳокамаларга сабаб бўлди.
Лойиҳани иккинчи ўқишга тайёрлаш жараёнида депутатларнинг таклифлари асосида олис ҳудудларда наркологик экспертизаларни ўтказиш учун ихтисослаштирилган туманлараро тиббий комиссияларни тузиш тартиби ҳамда ушбу комиссияларнинг фаолият тартиби Соғлиқни сақлаш вазирлиги томонидан белгиланиши аниқлаштирилгани айтиб ўтилди.
Қайд этилганидек, қонун лойиҳасида назарда тутилаётган нормалар ҳуқуқбузарликлар профилактикаси, жиноятларнинг олдини олиш, маҳаллаларда криминоген вазиятни барқарорлаштириш, фуқароларнинг ҳаёти ва соғлиғини янада самарали ҳимоя қилишга асос бўлади.
Қизғин муҳокама ва савол-жавоблардан сўнг қонун лойиҳаси иккинчи ўқишда қабул қилинди.
Муҳтарама Комилова,
ЎзА