Саудия Арабистонининг Ар-Риёд шаҳрида профессионал бокс бўйича ўтказилаётган WBC Гранд-присининг навбатдаги босқичида ҳамюртимиз Мужибилло Турсунов рингга кўтарилди.

Мусобақа тўртта дивизионда ташкил этилган бўлиб, унинг илк кунги баҳсларида супер енгил вазн тоифасида Турсунов аргентиналик Алан Эзикел Дутра билан жанг қилди. Қизғин ва муросасиз кечган беллашувда ҳакамлар қарорига кўра, ғалаба Мужибилло Турсуновга берилди. Шу тариқа, у жорий йил август ойида ўтказилиши режалаштирилган чорак финал йўлланмасини қўлга киритди.

Маълумот учун: Турсунов профессионал рингда ҳозиргача етти маротаба жанг ўтказган ва уларнинг барчасида зафар қучган. Алан Дутра эса бунгача 15 та жанг ўтказган бўлиб, бирор марта ҳам мағлуб бўлмаган эди. Бу эса аргентиналик боксчининг профессионал фаолиятидаги илк мағлубияти бўлди.

Жавоҳир Тошхўжаев, ЎзА