Москва дипломатларни Киевни тарк этишга чақирмоқда
Россия Киевда яшаётган хорижлик фуқаролар ва дипломатларга шаҳарни тарк этиш лозимлигини айтди, деб хабар берди Euronews.
Эвакуация ҳақидаги огоҳлантириш Россиянинг Киевга кенг кўламли ракета ва дрон ҳужумини амалга оширганидан бир кун ўтгач эълон қилинди. Бу 2022 йилдан бери Украина пойтахтига қилинган энг йирик ҳужумлардан бири, деб айтилмоқда.
Ҳужумлар оқибатда икки киши ҳалок бўлган ва 90 дан ортиқ одам жароҳат олган.
“Россия Қуролли кучлари Киевдаги Украина ҳарбий-саноат объектларига тизимли зарбалар беришни бошламоқда. Хорижлик фуқароларни, жумладан дипломатик миссиялар ва халқаро ташкилотлар ходимларини имкон қадар тезроқ шаҳарни тарк этишга чақирамиз” - дейилади Россия Ташқи ишлар вазирлиги баёнотида.
Россия президенти Владимир Путиннинг айтишича, бу қилинган ҳужум Украинанинг бир неча кун олдин Россия назоратидаги Луганск ҳудудидаги касб-ҳунар коллежига қилган ҳужумига жавоб бўлган. У ерда 21 киши ҳалок бўлгани айтилмоқда.
Ой бошида ҳам Россия хорижлик фуқаролар ва дипломатларни Киевни тарк этишга чақирган ва Украина Қизил майдондаги ҳарбий парадни издан чиқаришга уринса, пойтахт марказига кучли зарбалар берилишини билдирган эди.
Душанба куни маҳаллий аҳоли ва коммунал хизматлар Россиянинг якшанба кунги ҳужумидан кейинги вайроналарни тозалаш ишларини олиб борди. Киев шаҳар маъмурияти раҳбари Тимур Ткаченко маълумотига кўра, ҳужум оқибатида камида икки киши ҳалок бўлган ва 91 киши жароҳатланган.
Украина ташқи ишлар вазири Андрей Сибига бошчилигида 70 дан ортиқ элчи Россия зарбалари тушган жойларга борган ва улар хусусий уйлар, кўп қаватли турар жой бинолари ва бозорни кўздан кечирган. Маълум бўлишича, сўнгги бир сутка ичида вайрон қилинган уй-жойлар учун товон пули олиш бўйича 986 та ариза келиб тушган.
<iframe width="1256" height="706" src="https://www.youtube.com/embed/dhGEE_RjPZM" title="Moskva diplomatlarni Kievni tark etishga chaqirmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Искандар Исматов, ЎзА
