Миср Араб Республикасининг “Миср бугун”, “Ал-Аҳром”, “Парламент”, “Еттинчи кун” каби қатор нашрлари Парламентлараро Иттифоқ 150-ассамблеяси муносабати билан юртимизга келган ушбу мамлакат парламенти Вакиллар палатаси Спикери Ҳанафий Жабалий Олий Мажлис Сенатига ташриф буюрганини ёритди.

Мақолада доктор Ҳанафий Жабалий икки давлат раҳбариятининг ҳамкорликни кенгайтиришга интилиши, икки дўст халқ манфаатига хизмат қилиш йўлидаги изчил, мувофиқлашган саъй-ҳаракатлари туфайли ўзаро муносабатлар жадал ривожланаётганини таъкидлаган.

Шунингдек у Миср ва Ўзбекистон парламентлари ўртасидаги муносабатларга ҳам юксак баҳо берган. Шу билан бирга Парламентлар дўстлиги ассоциацияси фаолиятини янада кучайтириш, қонунчилик соҳасида тажриба алмашишга қизиқиш билдирган.

Сенат Раиси Танзила Норбоева ўз навбатида Миср Ўзбекистоннинг Яқин Шарқдаги ишончли ҳамкори экани, икки мамлакат халқлари ўртасидаги тарихий, маданий ва анъанавий алоқалар ҳамкорликни янада мустаҳкамлаш учун мустаҳкам пойдевор бўлиб хизмат қилаётганини алоҳида таъкидлаган.

Ўзаро ҳамкорликни чуқурлаштириш, парламентлардаги Дўстлик гуруҳлари ишини фаоллаштириш, қўшма тадбирлар ташкил этишга эътибор қаратилган.

Учрашув якунида Ҳанафий Жабалий Сенатнинг Фахрий меҳмонлар китобига дастхат ёзиб қолдирган.

М.Пирматова, ЎзА