Футбол бўйича Жаҳон чемпионатининг Осиё қитъаси учун 3-саралаш босқичида Ўзбекистон миллий терма жамоаси “A” гуруҳида Эрон, Қатар, БАА, Қирғиз Республикаси, КХДР термаларига қарши баҳс олиб боради.

Бугун, 5 сентябрь куни пойтахтимиздаги “Бунёдкор” стадионида мазкур гуруҳ босқичининг илк туридан ўрин олган Ўзбекистон — КХДР терма жамоалари баҳси бўлиб ўтади. Учрашув мамлакатимиз вақти билан соат 19:00да бошланади.  

Ўйинни бош ҳакам сифатида ўмонлик Аҳмад Абу Бакар ал-Каф бошқарса, унга қанотларда ҳамюртлари Абу Бакар ал-Амри ва Рашид Ҳамид ал-Гаити ёрдам беради. Тўртинчи расмий ҳакам сифатида эса Қосим Матар ал-Ҳатми ишлайди. Шунингдек, кувайтлик Абдуллоҳ Жамоли VAR ҳаками сифатида фаолият олиб боради.    

Маълумот ўрнида: 2026 йилда АҚШ, Канада ва Мексика мамлакатларида бўлиб ўтадиган футбол бўйича Жаҳон чемпионатида 48 та жамоа иштирок этиши белгиланган. Қитъамизга тўғридан-тўғри 8 та, қитъалараро плей-офф ўйинлари орқали эса битта ўрин ажратилган.    

Осиё қитъаси учун Жаҳон чемпионатининг 3-саралаш босқичида 18 жамоа ҳар бирида олтита жамоадан иборат учта гуруҳга бўлинди ва улар давра тизимида (уй-сафар) баҳслашади. Ҳар бир гуруҳдан энг яхши иккита ўринни эгаллаган терма жамоа 2026 йилги Жаҳон чемпионатига тўғридан-тўғри йўлланма олади.    

Осиё саралаш гуруҳларидан учинчи ва тўртинчи ўринларни эгаллаган 6 та терма жамоа якуний босқичда ҳар бири уч жамоадан иборат иккита гуруҳга бўлинган ҳолда давра форматида кураш олиб боради. 

Осиё плей-офф босқичидан энг яхши икки ўринни эгаллаган жамоалар «ЖЧ-2026» йўлланмасига эга бўлади. Ҳар икки гуруҳдан иккинчи ўринни эгаллаган жамоалар қитъалараро плей-оффда ОФК номидан иштирок этадиган жамоани аниқлаш учун ўзаро ўйин ўтказади.    

Жавоҳир Тошхўжаев,

ЎзА