Мерганлик маҳорати синовдан ўтди

Наманган шаҳрида Ўзбекистон Республикаси мудофаасига кўмаклашувчи “Ватанпарвар” ташкилоти ташкил этилганининг 35 йиллиги муносабати билан ўқ отиш ва пара ўқ отиш спорти бўйича Давлат хавфсизлик хизмати Наманган вилояти бошқармаси бошлиғи кубоги учун мусобақанинг биринчи босқичи ўтказилди.

Мусобақада вилоятнинг шаҳар ва туманларидан 89 нафар спортчи иштирок этиб, пневматик милтиқ ва тўппончадан ўқ отиш бўйича ўзаро куч синашди.

Беллашувлар якунига кўра, пара ўқ отиш спортининг ПП-3 машқида Дилдора Низомова, ВП-6 машқида эса Сарвиноз Ҳамидуллаева биринчи ўринни қўлга киритди.

Умумжамоа ҳисобида вилоят спорт ва амалий техник маркази жамоаси биринчи, Наманган шаҳар ўқув-спорт техника маркази иккинчи, Тўрақўрғон тумани жамоаси учинчи ўринни эгаллади.

[gallery-32425]

Мусобақа ғолиб ва совриндорлари “Ватанпарвар” ташкилоти томонидан диплом ва медаллар билан тақдирланди. Шунингдек, беллашувларда юқори натижа кўрсатган спортчилар муносиб рағбатлантирилди.

Ҳотам МАМАДАЛИЕВ (сурат), ЎзА