Мамлакатимизда аҳоли саломатлигини асрашда, аввало, спорт ва жисмоний ҳаракатни оммалаштиришга алоҳида эътибор қаратилмоқда.

Президентимиз Шавкат Мирзиёев раҳбарлигида аҳоли ўртасида соғлом турмуш тарзини татбиқ этиш ва оммавий спортни ривожлантириш борасида кенг кўламли ишлар йўлга қўйилмоқда. Жумладан, жисмоний имконияти чекланган ва ногиронлиги бўлган шахсларнинг спортга қизиқишини ошириш, паралимпия ҳаракатини ривожлантириш борасида қатор ишлар амалга оширилаётир.

Ўзбекистон давлат жисмоний тарбия ва спорт университети Паралимпия факультети декани, педагогика фанлари доктори (DSc), ёш профессорлардан бири Сойиб Тожибоев билан ушбу йўналишдаги амалий ишлар, келгусидаги вазифалар хусусида суҳбатлашдик.

– Юртимизда жисмоний имконияти чекланган ва ногиронлиги бўлган шахсларни спортга жалб этиш, паралимпия ҳаракатини ривожлантиришга устувор аҳамият қаратилаётганининг амалдаги натижалари нималарда кўринади?

– Ҳақиқатан ҳам мамлакатимизда давлат раҳбари бошчилигида спортга, паралимпия ҳаракатини ривожлантиришга алоҳида эътибор қаратилиб, аҳолининг оммавий спорт машғулотлари билан шуғулланиши учун қулай ва зарур шар-шароит яратиш борасида қатор ижобий ишлар амалга оширилмоқда. Натижада бугун аҳолининг барча қатлами, жумладан, жисмоний имконияти чекланган ва ногиронлиги бўлган шахсларнинг спортга қизиқиши ва интилиши ортиб бормоқда. Ушбу тоифадаги ёшларимизнинг спорт билан шуғулланиши учун шарт-шароитлар яратилиши ва мавжуд имкониятларнинг янада кенгайтирилиши уларга янада мотивация ва руҳий мадад бераяпти.

Ушбу соҳага қаратилаётган эътибор натижаси ўлароқ, юртимиз спортчилари Олимпия ва Паралимпия ўйинларида кетма-кет ғалабаларга, улкан ютуқларга эришаётир. Бу эса ёш спортчиларга катта туртки бўлмоқда. Кўпчилик талабаларимиз мазкур мусобақаларга чиқиш ҳаракатида ўз устида мунтазам ишлашга интилмоқда.

Давлатимиз раҳбарининг “2024 йил Париж шаҳрида (Франция) бўлиб ўтадиган XXXIII ёзги Олимпия ва XVII Паралимпия ўйинларига Ўзбекистон спортчиларини комплекс тайёрлаш тўғрисида”ги қарорида кўзда тутилган вазифалар паралимпия ҳаракатининг янада жадал ривожланишида муҳим омил бўлмоқда. Унда ёзги Олимпия ва Паралимпия ўйинларида қатнашиш ҳуқуқини берувчи лицензиялар сонини кўпайтириш, 2024 йил Париж шаҳрида бўлиб ўтадиган XXXIII ёзги Олимпия ва XVII Паралимпия ўйинларига спортчиларимизнинг ҳар томонлама тайёрлиги ва муваффақиятли иштирокини таъминлаш масалалари ўз аксини топган. Умуман, паралимпия ҳаракатини оммалаштириш, имконияти чекланган фуқароларни спортга кенг жалб этиш борасидаги амалий чора-тадбирлар алоҳида эътирофга молик.

– Шу ўринда Паралимпия факультети талабаларининг Паралимпия ўйинларига нисбатан интилиши, турли мусобақалардаги иштироки ҳақида тўхталиб ўтсангиз.

– Факультетимизда маҳоратли ёшларимиз жуда кўп. Уларнинг ҳаракатини, интилишини, келажакка бўлган ишончини кўриб, хурсанд бўламан. Айрим етти мучаси соғ ёшларнинг эса ҳаётга, ўз келажагига бепарволигига ачинаман, ёш, навқирон даврини бесамар ўтказаётганидан хафа бўламан.

Бизнинг талабаларимиз доимий равишда машғулотлар билан банд. Турли мусобақаларда фаол қатнашиб, қувонарли натижаларни қўлга киритишмоқда. Масалан, шу йил 22-24 апрель кунлари Параенгил атлетика бўйича Республика биринчилигида ядро улоқтириш бўйича Т.Йўлдошев, Ф.Оқмирзаев, М.Эргашова, Қ.Эргашов, О.Аҳмадов, О.Мусурмонқуловлар фахрли 1- ва 2- ўринларни қўлга киритди. Бундан ташқари, диск улоқтириш, найза улоқтириш, узунликка сакраш бўйича ҳам 1-, 2-ўринлар қўлга киритилди.

10-14 май кунлари эса Парапауэрлифтинг бўйича Республика биринчилигида ҳам 14 нафар талабамиз биринчи ва иккинчи ўринларни эгалладилар.

Бундан ташқари, 23-26 март кунлари Паравелоспорт бўйича Тожикистонда ўтказилган Осиё чемпионатида талабаларимиз Мирзаёров Ғолиббек C2-классда 1-ўрин, Полвонназаров Аваз C3-класда 1-ўрин, Ҳамдамова Одина Т2-классда 1-ўрин, Дадахонов Саиджаббор Т1-классда 2-ўрин, Ортиқов Аброр C2-классда 2-ўринларни қўлга киритдилар.23-30 апрель кунлари эса Армрестлинг бўйича Самарқандда бўлиб ўтган Осиё чемпионатида ҳам 2 нафар талабамиз 1-ўринга сазовор бўлган эди. Бир сўз билан айтганда, талабаларимизнинг бу каби ютуқ ва совринлари жуда кўп. Улар ўз устида доимий равишда ишлашдан тўхтамайдилар. Паралимпия ўйинларига чиқиш тараддудида ўз маҳоратларини ошириб боришмоқда.

– Давлатимиз раҳбарининг яқинда қабул қилинган “Паралимпиячиларнинг матонат мактаби фаолиятини ташкил этиш чора-тадбирлари тўғрисида”ги қарори соҳада янада юқори натижаларга эришишга замин бўлади, шундай эмасми?

– Дарҳақиқат, мазкур қарор билан Паралимпиячиларнинг матонат мактаби ташкил этилди ва ушбу мактабнинг асосий вазифалари белгилаб берилди. Жумладан, ёшлар, жисмоний имконияти чекланган ва ногиронлиги бўлган шахсларнинг қўлга киритган ютуқлари, уларнинг ибратли ҳаёт тарзини тарғиб қилиш бўйича таълим муассасалари, меҳнат жамоалари ҳамда маҳалларда ёшлар билан учрашувлар ташкил этиб, паралимпиячиларнинг ўз ҳаёт йўлларида қийинчиликларни қандай енгиб ўтганликлари ҳақида суҳбатлар ўтказиш, жисмоний имконияти чекланган ва ногиронлиги бўлган шахслар, айниқса, ёшларда ҳалоллик, виждонийлик, ватанпарварлик, садоқат, фидокорлик сингари шахс сифатларини, шунингдек, миллий ғурур туйғуларини шакллантиришга кўмаклашиш ушбу мактабнинг муҳим вазифаларидандир. Бундан ташқари, ёшларга юқори натижаларга эришган шахсларни ўрнак қилиб кўрсатиш орқали уларни матонатли этиб тарбиялаш, шу мақсадда илмий-амалий анжуманлар, савол-жавоб, китобхонлик кечалари, машҳур кишилар билан учрашувлар ташкил этиш вазифалари юкланди.

Шунингдек, қарорга кўра Тошкент шаҳри А.Қодирий кўчасида жойлашган пиёдалар юриш ва дам олиш масканида Паралимпиячилар боғи ташкил этилади. Тошкент метрополитенининг янги қурилаётган бекатларидан бирига “Паралимпия ҳаракати” номи бериладиган бўлди. 2023 йилдан бошлаб ҳар икки йилда бир маротаба Тошкент шаҳрида “Паралимпиячилар матонати” халқаро форумини ўтказиш белгилаб берилди. Бундай халқаро форумнинг ташкил этилиши, албатта, Матонат мактаби бўйича Ўзбекистон тажрибасини дунё мамлакатларига тарғиб этиш ҳамда спортга қизиқувчи имконияти чекланган шахсларга янада куч-ғайрат улашишда алоҳида аҳамият касб этади.

Бундан ташқари, эндиликда Паралимпия ўйинларида ғолиб ва совриндор бўлган спортчиларнинг таълим олган муассасаларида “Матонатли спортчиларимиз – фахримиз” хоналари ташкил этилади. Албатта, ушбу йўналишдаги саъй-ҳаракатлар келажагимиз эгалари бўлмиш ёшларни матонатли, кучли қилиб тарбиялаш, уларга мотивация беришда муҳим ўрин тутади.

Умуман, жисмоний имконияти чекланган ва ногиронлиги бўлган шахсларнинг спортга қизиқишини ошириш, уларнинг ютуқларини оммалаштириш ва бошқаларга матонат намунаси сифатида кўрсатиш ҳамда мотивация бериш борасида амалга оширилаётган саъй-ҳаракатлар таҳсинга сазовор. Бу йўналишдаги ишларда, албатта, биз соҳа вакиллари ҳам ташаббускор, ҳам ижрочи сифатида фаол иштирок этишимиз лозим. Шу маънода зиммамизда улкан масъулият, залворли вазифалар турганини ҳис қилиб, ҳаракатни кучайтиришимиз зарур, деб биламан.

ЎзА мухбири Муҳтарама Комилова суҳбатлашди