Мария Тимофеева франциялик теннисчига қарши кортга чиқади
Теннис бўйича Ўзбекистон терма жамоасининг икки нафар вакили Мария Тимофеева ва Полина Кудерметова Туркиянинг Истанбул шаҳрида аёллар ўртасида давом этаётган WTA125 таснифига кирувчи халқаро турнирда иштирок этаётгани ҳақида хабар берган эдик.
Улар мазкур мусобақанинг чорак финал босқичида ўзларининг навбатдаги ўйинларини ўтказди.
Жумладан, мамлакатимизнинг учинчи рақамли теннисчиси Мария Тимофеева 1/4 финалда Буюк Британия вакили Франческо Йонес устидан 7:6, 6:3 ҳисобида зафар қучди. Шу тариқа, ярим финалда франциялик Алисе Тубеллога қарши кортга чиқиш ҳуқуқини қўлга киритди.
Дарвоқе, мукофот жамғармаси 115 минг АҚШ долларини ташкил этувчи ушбу мусобақанинг чорак финалида иккинчи рақамли теннисчимиз Полина Кудерметова айнан Алисе Тубеллога 6:4, 3:6, 4:6 ҳисобида имкониятни бой бериб қўйган эди.
Жавоҳир Тошхўжаев, ЎзА
