Сурхондарё вилоятида блогер мактаб директоридан 500 АҚШ доллар талаб қилиб, олгани ҳақида турли гап-сўзлар тарқалди. Мазкур ҳолат қандай юз бергани хусусида Сурхондарё вилоят прокуратураси расмий баёнот берди.

– Бош прокуратура ҳузуридаги Департаментнинг Денов туман бўлими, ДХХ Денов шаҳар бўлими ва туман прокуратураси ходимлари билан ҳамкорликда фуқаро А.Х.нинг аризасига асосан ўтказилган тезкор тадбирда Олтинсой тумани “Обшир” маҳалласида яшовчи С.Ш. Денов туманидаги 79-сонли ўрта таълим мактаби фаолияти юзасидан тайёрланган асоссиз танқидий материалларни “Facebook” ижтимоий тармоғидаги “Сурхондарё ва Сурхондарёликлар” каналига жойлаштириб, ариза муаллифи А.Х.дан маълумотларни ижтимоий тармоқдан олиб ташлаш эвазига 500 АҚШ доллари беришини талаб қилиб, ундан товламачилик йўли билан 500 АҚШ долларини жияни Э.Ш. орқали олган вақтида ашёвий далиллар билан ушланган.  

Мазкур ҳолат юзасидан 01.11.2022 йилда Департаментнинг Денов туман бўлими томонидан С.Ш. га нисбатан Ўзбекистон Республикаси ЖКнинг 165-моддаси 1-қисми (товламачилик) билан жиноят иши қўзғатилган.

Ҳозир жиноят иши юзасидан дастлабки тергов ҳаракатлари Денов тумани прокуратураси томонидан олиб борилмоқда, дейилган баёнотда.  

Холмўмин МАМАТРАЙИМОВ,  

ЎзА мухбири