Тошкентдаги “Универсал” спорт саройида аёллар ўртасида кураш бўйича илк маротаба ўтган “Кураш маликалари кубоги" мусобақасида ғолиб ва совриндорлар номи аниқланди.

8 март – Халқаро хотин-қизлар куни муносабати билан ташкил этилган мазкур мусобақада иштирокчилар 5 та вазн тоифасида ўзаро баҳслашди. Умумжамоа ҳисобида биринчи ўринни Тошкент вилояти жамоаси эгаллади. Сурхондарё вилояти термаси эса шоҳсупанинг иккинчи поғонасидан жой олди. Тошкент шаҳри ва Самарқанд вилояти жамоалари кучли учликни якунлаб берди.

Шунингдек, “Энг моҳир кураш маликаси”, “Энг яхши аёл ҳакам”, “Энг яхши қизлар мураббийси”, “Энг яхши аёллар мураббийси”, “Энг фаол ташкилотчи аёл”, “Курашнинг хорижлик фидойи аёли”, “Курашнинг фидойи санъаткори” номинациялари бўйича энг яхшилар сараланди.

Мусобақа ғолиб ва совриндорлари «Кураш маликалари кубоги» рамзи туширилган кубок, диплом ва қимматбаҳо эсдалик совғалари билан тақдирланди.

Жавоҳир ТОШХЎЖАЕВ, ЎзА