Кураш: Душанбе XV Осиё чемпионатига мезбонлик қилади
Халқаро кураш ассоциацияси, Осиё кураш конфедерацияси ҳамда Тожикистон кураш федерацияси келишувига биноан жорий йилги катталар ўртасидаги XV Осиё чемпионати 11–15 июнь кунлари Душанбе шаҳрида бўлиб ўтади.
"Dushanbe Tennis Palace and Water Sport Complex" мажмуасида ташкил этилиши кутилаётган чемпионат Осиёнинг энг кучли спортчиларини аниқлаш билан бирга, IKA рейтинг очколарини тақдим этиш билан аҳамиятли.
Чемпионатда 17 ёшдан юқори бўлган спортчилар иштирок этиши, ҳар бир мамлакат ҳар бир вазн тоифасида биттадан спортчи билан қатнашиши, барча иштирокчилар ўз давлати фуқароси бўлиши назарда тутилган бўлиб, мусобақа низомига мувофиқ алоҳида Қочқинлар жамоаси аъзолари ҳам қитъа биринчилигида иштирок этишига изн берилади.
Анъанага мувофиқ, чемпионат доирасида IKA халқаро ҳакамлар семинари, ҳакамлик имтиҳонлари, шунингдек, Осиё кураш конфедерацияси конгресси ва бошқарув қўмитаси йиғилиши ўтказилиши режалаштирилган.
Иштирокчиларни рўйхатдан ўтказиш IKAнинг расмий электрон тизими орқали амалга оширилади. Аризаларни қабул қилишнинг сўнгги муддати 2026 йил 4 июнь этиб белгиланган.
Т.Рўзиев,
ЎзА
