Куба АҚШга кескин огоҳлантириш берди
Куба президенти Мигель Диас-Канель ижтимоий тармоқдаги баёнотида унинг мамлакати ҳеч кимга таҳдид солмаётгани ва тажовузкор режалари йўқлигини таъкидлади, деб хабар қилди Euronews.
Куба президентининг бу баёноти Куба Россия ва Эрондан ҳарбий дронлар сотиб олгани ҳақида хабар тарқатганидан кейин янгради.
Куба раҳбари мазкур хабарни тасдиқламаган, лекин инкор ҳам қилмаган. У X платформасида ёзган постида Куба, жумладан АҚШ учун ҳам ҳеч қандай хавф туғдирмаслигини билдирди.
Шу билан бирга, у бутун дунё Вашингтоннинг Кубага нисбатан таҳдидларидан хабардорлигини айтди ва АҚШни душманона ҳаракатлардан тийилишга чақирди. Акс ҳолда, минтақада қонли қирғин юз бериши ва бу жуда катта талофатларга олиб келиши мумкинлигидан огоҳлантирди.
Куба ташқи ишлар вазири Бруно Родригес ҳам президент фикрини қўллаб-қувватлади. Унинг айтишича, Вашингтон оролга қарши иқтисодий босим ва эҳтимолий ҳарбий аралашувни оқлаш учун сунъий баҳона яратмоқда. Бугун икки давлат ўртасидаги муносабатлар кескинлашган. Томонлар ўртасидаги зиддият сўнгги ўн йилликлардаги энг оғир босқичлардан бирига чиққан, дейиш мумкин.
Оқ уй Кубада ҳокимият алмашишини қўллаб-қувватлаб, нефть ва газ етказиб беришни чекламоқда ҳамда мамлакат иқтисодиётининг муҳим соҳаларига қарши санкцияларни кучайтирмоқда.
Март ойида Дональд Трамп “бир куни Кубани ўз назоратига олиши мумкинлиги”га ишонч билдирган эди. Трампнинг бу гаплари вазиятни янада кескинлаштириб юборди, дейиш мумкин.
<iframe width="650" height="420" src="https://www.youtube.com/embed/zGfBGOSEDFw" title="Kuba AQShga keskin ogohlantirish berdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Искандар Исматов, ЎзА
