Маълумки, Корея Республикаси Ўзбекистон билан узоқ йиллар давомида кўп томонлама ҳамкорлик қилиб келади, шу жумладан спорт соҳасида ҳам.

 Кураш каби, таэквондо ҳам Кореянинг миллий спорт тури сифатида ушбу мамлакатда машҳур бўлиб, юртимизда спортнинг мазкур йўналишини ривожлантиришга ҳамкорларимиз томонидан катта эътибор қаратиб келинмоқда. Бу ҳақида пойтахтимиздаги “Универсал” спорт саройида ўтказилган “Корея Республикаси элчиси кубоги” турнирининг очилиш маросими алоҳида тўхталиб ўтилди.

Унда Ўзбекистон спорт вазири Адҳам Икромов, мамлакатимиз таэквондо WT ассоциацияси раиси Шерзод Тошматов ва Жанубий Кореянинг Ўзбекистондаги Фавқулодда ва мухтор элчиси Вон До Ён иштирок этди ва нутқ сўзлашди. 

Мусобақалар бошланиши олдидан давлат мадҳияси янгради, сўнгра таэквондочиларнинг кўргазмали чиқишлари ташкил этилди. Айтиш керакки, 4 сентябрь “Бутунжаҳон таэквондо куни” муносабати билан 15-17 ёшдаги спортчилар ўртасидаги таэквондо WT бўйича XXII халқаро турнирда мамлакатимизнинг турли ҳудудларидан келган 400 нафардан ортиқ спортчи ғолиблик учун куч синашмоқда.

<iframe width="640" height="420" src="https://www.youtube.com/embed/pFD9eyZrSlI" title="Корея Республикаси билан спорт соҳасида ҳамкорлик" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мазкур мусобақа дастурига мувофиқ, икки кун давомида таэквондо кёруги (жанг) тури бўйича баҳслар бўлиб ўтади. Унда йигит-қизлар ўнта вазн тоифасида майдонга чиқиб, ғолиблик учун кураш олиб боради. 3 кунлик мусобақалар 5 сентябрь куни якунланади. Албатта, ушбу спорт турининг юртимиздаги ривожи бевосита ана шундай юқори савияда ташкил этиладиган мусобақаларга ҳам боғликдир. Зеро, бу каби беллашувлар келгусида Олимпия ва миллий терма жамоаларимизнинг шаклланишида муҳим аҳамият касб этади. 

Санжар Тошпўлатов, Жавоҳир Тошхўжаев, Аброр Содиқов, Улуғбек Тўхтаев (видео), ЎзА