Тошкент давлат шарқшунослик университети ва Корея Республикасининг Андонг Миллий университети ўртасида ҳамкорлик йўлга қўйилди. Бугун Тошкентда мазкур “LINC 3.0 Global Capstone Design” қўшма лойиҳасини ишга тушириш маросими бўлиб ўтди.

Томонлар имзолаган тегишли битимга мувофиқ икки давлат талабалари иштирокида гуманитар ва туризм соҳаларида ҳамкорлик йўлга қўйилиши белгиланган.

Ташкилотчилар Ўзбекистон ва Корея давлатларининг тарихий жозибадорлигини намойиш этиш, туризм салоҳиятини кенгроқ намойиш этиш, шунингдек, тарих музейлари жозибадорлигини оширишга қаратилган медиа контент тайёрлаб, экспозицияларни жонлантиришга оид таклифлар ишлаб чиқиш мақсадини кўзлаган.

Тадбирда Корея Республикаси Андонг Миллий университетининг 50 дан зиёд профессор-ўқитувчилари ва талабалари, шунингдек ТДШУ, Ўзбекистон Миллий университети ва Тошкент кимё-технология институтидан жами 60 нафар вакил иштирок этди.

Лойиҳа 2 босқичда – Ўзбекистонда ва Кореяда амалга оширилади. Бу галги учрашувда ташаббус доирасида режалаштирилган дастурлар ҳақида батафсил маълумот берилди. Бугундан бошлаб икки мамлакат профессор-ўқитувчилари, талабаларидан таркиб топган 80 кишилик жамоа аввалига бир ҳафта мобайнида Тошкентда, кейинги ҳафтадан эса Кореяда ўқув машғулотида қатнашади.

Гўзал Сатторова, ЎзА