Канада АҚШга жавоб тарифи жорий этмоқда
Канада Молия вазирлиги маълум қилишича, 8 сентябрдан бошлаб мамлакат ҳукумати Американинг айрим товарларига 15, 25 ва 50 фоиз миқдорида жавоб тарифини амалиётга киритади.
Ушбу чора тахминан 20 миллиард долларлик Америка маҳсулотлари, жумладан автомобиль, мотоцикл, маиший ва электр жиҳозлар, қишлоқ хўжалиги техникаси ҳамда қоғоз-картонга дахлдор. Пўлат, алюминий ва ушбу унсурлардан тайёрланган буюмлар божи миқдори 25 фоиздан 50 фоизга кўтарилади. АҚШ чекловидан жабр кўрган маҳаллий ишчилар ва бизнес вакилларини қўллаб-қувватлаш мақсадида Оттава 5,4 миллиард доллар ажратилишини эълон қилди. Бу маблағ тадбиркорлар учун имтиёзли кредит бериш ва ишсизлик нафақасини соддалаштирилган тартибда тарқатишга йўналтирилади.
Ҳозирги кескинлик Президент Дональд Трамп томонидан июль ойида Канада экспортига қарши 50 фоизлик тарифни назарда тутувчи фармон имзолангандан сўнг юзага келди. Гарчи келишувга эришиш умидида тегишли чора вақтинча кечиктирилган бўлса-да, музокара натижа бермади ва шанба кунидан эътиборан 20 миллиард долларлик Канада товарларига нисбатан 50 фоизлик АҚШ тарифи кучга кирди. Қолаверса, Трамп 2027 йил 1 январдан бошлаб Канадада ишлаб чиқарилган енгил ва юк автомобиллари, эҳтиёт қисмлар ва пўлат учун божни 50 фоизгача чиқариш мўлжалланаётганини билдирди.
Бош вазир Марк Карни эса Вашингтоннинг бу ҳатти-ҳаракатига Оттава муносиб ва тенг жавоб қайтаришини таъкидлади.
Ф.Яхшибоева, ЎзА
