19 декабрь куни Халқ депутатлари Жиззах вилоят Кенгашининг навбатдан ташқари сессияси бўлиб ўтди.

Сессияни Халқ депутатлари вилоят Кенгаши раиси Парда  Шукуров олиб борди.

Кун тартибига мувофиқ ташкилий масала кўрилди.

Ўзбекистон Республикаси Президентининг тегишли фармонларига асосан Эргаш Алибекович Салиев бошқа ишга ўтиши муносабати билан Жиззах вилояти ҳокими лавозимидан озод этилди.

"Ҳудудий электр тармоқлари" акциядорлик жамияти бошқаруви раиси лавозимида ишлаб келган Улуғбек Мавлонович Мустафоев Жиззах вилояти ҳокими вазифасини бажарувчи этиб тайинланди.

Улуғбек Мустафоев 1968 йил 14 августда Жиззах вилоятида туғилган.  

У.Мустафоев Тошкент халқ хўжалиги институтини битирган. “Саноатқурилишбанк”нинг Жиззах вилоят филиалида кичик, кейинчалик катта мутахассис бўлган. Кейинги йилларда Ўзбекистон Республикаси Марказий банкининг операцион бошқаруви катта иқтисодчиси ва пул муомаласи бўлими бошлиғи лавозимларида ишлаган.  

У 2016 йилгача Ўзбекистон Республикаси Марказий банки раисининг биринчи ўринбосари, 2016 йилда Жиззах вилояти ҳокимининг биринчи ўринбосари, 2017 йилда “Ўзбекэнерго” АЖ бошқаруви  раиси лавозимига тайинланган.

2019 йилдан буён Улуғбек Мустафоев “Ҳудудий электр тармоқлари”  акциядорлик жамияти бошқаруви раиси вазифасида ишлаб келаётган эди.

Сессияда Ўзбекистон Республикаси Бош вазири Абдулла Арипов иштирок этди.

А.Қаюмов,

ЎзА мухбири