Кечиримлилик, бағрикенглик халқимизга хос фазилат. Мамлакатимизда инсонпарварлик сиёсати натижасида, ҳақ йўлдан адашиб жиноят содир этиб, жазо ўтаётган шахсларга қилган ишидан пушаймон бўлиб, тузалиш йўлига ўтиб, жамиятга нафи тегадиган инсон бўлиб қайтишлари учун кенг имкониятлар яратилмоқда.

Қолаверса, миллий қонунчиликда ҳам шахс тайинланган жазонинг маълум қисмини амалда ўтаб, ўзига тегишли хулоса чиқариб, меҳнатга ҳалол муносабатда бўлса ва белгиланган тартиб-қоидаларга қатъий риоя қилса, жазо муддатидан илгари озод қилиниши мумкинлиги белгиланган.

Наманган вилояти Чортоқ тумани ички ишлар бўлими пробация гуруҳи томонидан киритилган, суд ҳукми билан жазо ўтаётган икки нафар аёлнинг жазосини муддатидан илгари шартли озод қилиш ҳақидаги тақдимномалари ва маъмурий ҳуқуқбузарлик содир этган бир нафар аёлнинг маъмурий иши жиноят ишлари бўйича туман судининг сайёр суд мажлисида кўриб чиқилди.

Суд томонидан ушбу икки маҳкумага нисбатан халқимизга хос инсонпарварлик тамойиллари амалда қўлланилди. 

Жазони ўташ тартиб-қоида талабларини бажарган ва меҳнатга ҳалол муносабатда бўлган, озодликни чеклаш жазосини ўтаётган бу аёллар Жиноят кодексининг 73-моддасига биноан жазо муддатидан илгари шартли равишда озод қилинди. Демак, улар 8-март байрамини ўз уйида яқинлари даврасида кутиб оладиган бўлди.

Шунингдек, Маъмурий жавобгарлик тўғрисидаги кодекснинг 183-моддасида назарда тутилган ҳуқуқбузарликни содир этган аёл эса жазоланмасдан огоҳлантириш билан чекланди.

                                                                                                               Оқилхон Дадабоев, ЎзА