Жанубий Корея Президенти Юн Сок Ёлнинг қайнонаси Чхве Ин Сун апелляцияси суд томонидан рад этилгандан кейин ҳибсга олинган. Унинг ер сотиб олишда қалбаки ҳужжатдан фойдалангани таъкидланмоқда, деб хабар тарқатди “Рёнхап” агентлиги.

2021 йил декабрда айни иш бўйича суд унга бир йиллик қамоқ жазоси белгилаганди, бироқ ўшанда айбдор ҳибсга олинмаган.

“Президент Юн Сок Ёлнинг қайнонасининг апелляцияси жума куни суд томонидан рад этилди. Молиявий ҳужжатларни қалбакилаштиргани учун берилган бир йиллик қамоқ ҳукми ўз кучида қолдирилгач, айбдор ҳибсга олинди”, - дейилади хабарда.

Апелляция суди 76 ёшли аёлни 2013 йил қалбаки банк маълумотномаси тайёрлаб, ҳужжатдан Сеул яқинидаги Соннам шаҳрида ер сотиб олиш учун фойдалангани сабабли айбдор, деб топган. Қалбаки қоғозга асосан, у 34,7 миллиард вон – тахминан 27 миллион долларни ҳисоб рақамига ўтказган.

Қарор “жиноят оғирлиги” боис кучида қолдирилди”, деди судья. Ҳукм эълон қилинганда аёл ҳушдан кетган.

Дарвоқе, Чхве Ин Сун банк ҳужжатини қалбакилаштириш бўйича биринчи марта терговга тортилгани йўқ. Декабрь ойида у давлат тиббий суғурта хизматидан ёрдам пули олиб, ҳуқуқ-тартибот идоралари эътиборини тортган. Ўшанда суд жиноятчига нисбатан уч йиллик қамоқ жазоси белгилаши керак эди. Айбловга кўра, 2015 йилгача хоним давлат тиббий суғурта хизматидан ноқонуний равишда 2,29 миллиард вон, яъни тахминан 1,7 миллион доллар ёрдам пули олган.