Жаҳон чемпионатида ёш ушучиларимиз 4 та медални қўлга киритди
Хитойнинг Тяньцзи́нь шаҳрида ёшлар ўртасида ўтказилган Х жаҳон чемпионатида Ўзбекистон терма жамоаси аъзолари тарихий натижага эришди.
Дунёнинг 78 та давлатидан 1100 нафардан зиёд ёш спортчилар қатнашган муросасиз беллашувларда мамлакатимиз ушучилари 4 та медални қўлга киритди.
Чемпионатда ушунинг таолу ва саньда йўналишларида умумий ҳисобда 83 та медаллар жамланмаси учун беллашувлар бўлиб ўтди.
Терма жамоамиз аъзоларидан Азизбек Турғунбоев -60 килограмм вазнда дунёнинг тенгсиз спортчиси эканини намойиш этиб, олтин медалга эгалик қилди. Унинг шарафига жаҳон чемпионатида Ўзбекистон байроғи юксалиб, ватанимиз мадҳияси баралла янгради.
Шунингдек, маҳоратли ушучиларимиздан Беҳрузбек Норматов -42 килограмм оғирликда, Абдуллоҳ Раҳмонов -45 килограммда кумуш медалларга эга чиққан бўлса, Сарварбек Тоҳиров -52 килограмм вазн тоифасида жаҳон биринчилигининг бронза медали соҳиби бўлди.
Х жаҳон чемпионатида мамлакатимиз спорт шарафини улуғлаган терма жамоамиз аъзолари бугун, 31 март куни юртимизга қайтиб келади.
Т.Рўзиев,
ЎзА
