Халқаро кураш ассоциацияси хабарига кўра, Италия кураш академияси расман ўз фаолиятини бошлади. У Италияда расмий рўйхатга олиниб, давлат идоралари томонидан тасдиқлангани тўғрисидаги хужжат Халқаро кураш ассоциациясига тақдим этилди.
Янги ташкил этилган Италия кураш академиясини қўллаб-қувватлаш мақсадида Халқаро кураш ассоциацияси Кураш институти ва Ўзбекистон кураш федерацияси жорий йил февраль ойи охирида Европанинг ушбу мамлакатида мураббийлик семинарини ташкил этади.
Ўзбекистон кураш федерацияси ҳамда манфаатдор ташкилотлар билан ҳамкорликда ўтказиладиган ушбу семинар Европанинг барча мамлакатлари вакиллари учун очиқ ҳисобланади. Семинар давомида курашни кўҳна қитъада оммалаштиришда иштирок этадиган мутахассис ва спортчиларга кураш яктаклари, ўқув-қўлланмалар тарқатилади.
Мазкур кураш семинари 2024 йилнинг июль ойида ўтказилиши режалаштирилаётган халқаро турнирга тайёргарликнинг муҳим босқичи ҳисобланади. Италияда соврин жамғармасига эга халқаро турнир ташкил қилинади.
Т.Рўзиев,
ЎзА