Самарқанд вилоятида ўтказилган назорат тадбирларида Пастдарғом туманидаги “А.Б.” фермер хўжалигига қарашли ошхона, ушбу туманидаги “Ф.З.Д.” оилавий корхонасига қарашли тўйхона, Оқдарё туманидаги “И.С.О.” оилавий корхонасига қарашли тўйхона ва Пахтачи туманидаги “А.У.А.Ҳ.777” МЧЖ газ тармоғига ноқонуний уланган.

Мазкур тўртта ҳолатда 1 миллион 353 минг 154 метр куб миқдорида табиий газдан ноқонуний фойдаланилган. Бунда давлат манфаатига 1 миллиард 294 миллион 234 минг сўм зарар етказилган.

Таҳлил қилинишича, ушбу миқдордаги табиий газ ҳозирги кунда 6 минг 765 хонадоннинг бир ойлик истеъмолига тўғри келади. 

"Ўзэнергоинспекция" матбуот хизмати ушбу ҳолатга доир ҳужжатлар ҳуқуқни муҳофаза этувчи органларга тақдим қилинганини маълум қилди. 

Н. Зиёдуллаева, ЎзА