Навоий вилояти Шимолий кон бошқармаси тизимида янги технологияларни ишга тушириш, мавжудларини модернизация қилиш ва кенгайтириш асосида маҳсулот ишлаб чиқариш ҳажмини кўпайтириш борасида узлуксиз ва тизимли ишлар олиб борилмоқда.
Жумладан, 3-гидрометаллургия заводи Қуюлтириш, саноат чиқиндиларини зарарсизлантириш ва реагентлар тайёрлаш цехида ҳам бу борада мақсадли ишлар амалга оширилмоқда. Мазкур цехнинг асосий вазифаси майдалаш цехидан келиб тушадиган бўтанани қуюлтириш, қуюлтирилган бўтанани насослар ёрдамида сорбция, регенерация ва тайёр маҳсулотлар цехига етказиш ва ажратилган сувни қайта технология жараёнига етказиб беришдан иборат. Шу билан бирга темир йўл транспортида келтирилган турли реагентларни қабул қилиш, сақлаш ишлари, праестол ва каустик сода эритмалари, оҳак сути ва оҳактош бўтаналарини тайёрлаб, уларни ишлаб чиқариш жараёнига етказиб бериш ҳам цех зиммасига юкланган.
[gallery-24213]
– Цехимизда қурилиш монтаж ишлари 1993-1995 йилларда бошланган, – дейди цех бошлиғи Бобир Ширинов. – 1995 йил 17 майда диаметри 100 метрлик қуйилтиргич ишга туширилган ва биринчи марта Сорбция бўлимига қуйилтирилган бўтана етказиб берилган. 2008 йили эса оҳактош бўтанасини тайёрлаш биноси ишга туширилди. Цехда тегирмондан чиқарилган маҳсулотнинг сифатини яхшилаш ва қум миқдорини камайтириш мақсадида гидроциклонлар ишга туширилган ва бугун бу жараён ўз самарасини бермоқда. Натижада оҳак сарфини камайтиришга эришилмоқда.
Ҳозирда 89 нафар муҳандис-техник ходимлар ва ишчилар меҳнат қилаётган цехда технологик жараённи яхшилашга алоҳида эътибор қаратилган. Жумладан, техник сувдан кам миқдорда фойдаланиш учун оҳактошни тайёрлашда айланма сувларни ишлатиш жараёни йўлга қўйилди. Полиакриламид тайёрлаб бериш жараёнида контактли чанларни 3 тадан 8 тага кўпайтириш йўли билан тайёрлаш жараёни вақти узайтирилди. Натижада реагент сифати яхшиланди ва қуюлтириш жараёни қуввати суткасига 23 мингдан 28 минг тоннагача кўтарилди.
Оҳактош бўтанасини тайёрлаш биносида эса тегирмонда майдалаш жараёнида циркуляцион юкламани камайтириш ва тегирмон ишлаб чиқариш қувватини ошириш мақсадида ёйсимон ғалвирлар ўрнатилди. Бу эса қувур ва насосларнинг вақтидан олдин ишдан чиқишини бартараф қилмоқда.
А.Бўриев, С.Аслонов (сурат), ЎзА мухбирлари