Адлия вазирлиги ҳузуридаги Интеллектуал мулк агентлигида “Коррупцияга қарши курашиш тизимини бошқариш” – ISO 37001:2016 халқаро стандартига мувофиқлик сертифакатини топшириш маросими бўлиб ўтди.

Тадбирда БМТнинг Тараққиёт дастури, “СЕRT Group” халқаро ташкилоти, Коррупцияга қарши курашиш агентлиги, КПМГ Россия ва МДҲ мамлакатларида Хатарларни бошқариш консалтинг департаменти вакиллари иштирок этди.

Маълумки, ISO 37001:2016 халқаро стандарт сертификати коррупция ҳолатларининг олдини олиш, аниқлаш, зарур чораларни кўриш ҳамда коррупция хавфини камайтиришга йўналтирилган мақбул ва аниқ мезонли чора-тадбирларни назарда тутади.

Маълумотларга кўра, коррупция туфайли дунё иқтисодиёти 2,6 триллион долларни йўқотмоқда, бу дунёдаги мавжуд ялпи ички маҳсулотининг 5 фоизидан кўпроғини ташкил этади. Тадбирда коррупция дунёнинг кўплаб мамлакатларидаги энг долзарб муаммолардан бирилиги, унинг давлат органлари фаолиятини ривожланишига ва инсоният тақдирига салбий таъсир кўрсатиши хусусида сўз юритилди. Мамлакатлар ҳукуматлари коррупцияга қарши курашиш учун турли хил давлат дастурларини қабул қилаётгани, аммо, унинг натижаси кутилганидек самарали бўлмаётганлиги таъкидланди.

– ISO 37001:2016 “Коррупцияга қарши бошқарув тизимлари – Фойдаланиш учун талаблар ва тавсиялар” халқаро стандартининг ишлаб чиқилишини глобал миқёсда коррупцияга қарши курашда муҳим қадам, деб ҳисоблаш мумкин, – деди Интеллектуал мулк агентлиги матбуот котиби Феруз Жўраев. – Ушбу сертификат агентлик фаолиятининг барча йўналишларини қамраб олиб, фуқароларнинг ишончини қозониш, ходимларнинг ҳалолликка риоя қилиши, ҳуқуқбузарликларни камайтириш ҳамда аҳолига давлат хизматлари кўрсатишнинг шаффоф ва самарали тизими яратилиши натижасида қўлга киритилди.

Таъкидлаш жоизки, КПМГ халқаро ташкилрти 2019 йил ноябрь-декабрь ойларида агентлик фаолиятида коррупцияга дуч келиши мумкин бўлган ҳолатларни чуқур таҳлил қилди ҳамда фаолиятнинг 10 та йўналиши бўйича 145 та коррупциявий хатар аниқланди. Ушбу камчиликларни бартараф этиш бўйича КПМГ ташкилоти томонидан таҳлилий ҳисобот тайёрланди, унда аниқланган камчиликларни бартараф этиш бўйича тавсиялар берилди.

Агентлик коррупцияга қарши кураш тизимини БМТ Тараққиёт дастури ҳамкорлигида ва КПМГ халқаро ташкилотининг мутахассислари кўмагида жорий этди. Ўтган бир йил давомида манффатлар тўқнашувини бошқариш, ходимларни ишга қабул қилиш тартиби, давлат харидлари иштирокчиларини текшириш билан боғлиқ 17 дан ортиқ ички идоравий ҳужжатлар қабул қилинди.

Бу каби ўзгаришлар ўз навбатида агентлик фаолиятида коррупциявий хавф-хатарларни олдини олишда ўзининг ижобий таъсирини кўрсатади. Қолаверса, ушбу сертификат орқали мамлакатимизнинг халқаро майдондаги имижи ва рейтингларида акс эттишида бевосита аҳамиятга эга.

 

Гулноза БОБОЕВА, ЎзА