Ҳумоюн Султонов яна бир бор Европада чемпион бўлди
Хорватиянинг Загреб шаҳрида теннис бўйича ўтказилган М25 тоифасидаги халқаро турнирда Ҳумоюн Султонов чемпионликни қўлга киритди.
Хорватия пойтахти Загреб шаҳри мезбонлик қилган Халқаро теннис федерацияси (ITF) тақвимига кирувчи М25 тоифасидаги мусобақанинг яккалик баҳслари финалида ҳамюртимиз Ҳумоюн Султонов Шимолий Македония вакили Калин Ивановскига қарши кортга чиқди.
Ҳал қилувчи учрашувда Ҳумоюн Султонов ҳар икки сетни ҳам бир хил — 6:4 ҳисобида ўз фойдасига ҳал этиб, турнирнинг бош совринини қўлга киритди. Ушбу ғалаба эвазига ҳамюртимиз 25 рейтинг очкоси ҳамда 4 минг 612 АҚШ доллари миқдоридаги мукофот пулига сазовор бўлди.
Таъкидлаш жоиз, Ҳумоюн Султонов сўнгги ҳафталарда мусобақаларда барқарор иштирок этмоқда. У ўтган ҳафта Венгриядаги халқаро турнирда финалгача етиб бориб, вице-чемпионликни қўлга киритган бўлса, июнь ойи бошида Словенияда ўтказилган М25 тоифасидаги мусобақада чемпионликни нишонлади.
Жавоҳир Тошхўжаев,
ЎзА
