Куни кеча пойтахтимизда бошланган “Вакиллик ҳокимияти органлари тизимини модернизация қилишнинг конституциявий-ҳуқуқий муаммолари: Ўзбекистон учун халқаро тажриба” мавзусидаги халқаро илмий-амалий анжуман бугун ўз ишини давом эттирмоқда.

Ўзбекистон Республикаси Президенти ҳузуридаги Қонунчилик ва ҳуқуқий сиёсат институти томонидан Ўзбекистон Республикаси Конституциявий суди ва Олий Мажлис Қонунчилик палатаси билан ҳамкорликда ташкил этилган мазкур анжуманда янгиланган Конституция шароитида парламент ва маҳаллий Кенгашлар фаолиятини такомиллаштиришнинг долзарб масалалари қизғин муҳокама қилинмоқда.  

Конференциянинг аҳамияти хусусида депутатларнинг фикр-мулоҳазалари билан қизиқдик.

— 30 апрель куни Конституциямиз янги таҳрирда қабул қилинганига 2 йил тўлади, — дейди Олий Мажлис Қонунчилик палатаси депутати Хушвақт Ҳайитов. — Шу даврда янги конституциявий нормалар асосида муайян ютуқларга эришилди. Хусусан, парламент ва вакиллик органлари фаолияти янги босқичда ривожланди.  

Парламент фаолиятини такомиллаштириш, халқаро илмий тажрибалар бугунги конференция кун тартибида муҳокама қилинмоқда. Унда ўнга яқин давлат вакиллари, парламентарийлари иштирок этиб, ўз тажрибаларини бўлишишаётгани ва Ўзбекистон тажрибасига ҳам эътибор бериб, қиёсий таққослашаётгани эътиборга молик. Хорижий экспертлар томонидан Ўзбекистондаги ислоҳотлар юқори баҳоланмоқда. Айниқса, Конституциямизда инсон ҳуқуқларига оид нормалар уч баробардан зиёд ошгани, давлатнинг ижтимоий мажбуриятлари ортгани ижобий эътироф этилмоқда.  

<iframe width="640" height="420" src="https://www.youtube.com/embed/UvvwLhDZ9pw" title="Xorijiy ekspertlar Oʻzbekistondagi islohotlarni yuqori baholamoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Халқаро илмий-амалий анжуман давом этмоқда. 

Муҳтарама Комилова,

Анвар Аҳмедов (видео), ЎзА