Хорижда қонуний меҳнат: Зафарободда ёшлар учун янги имкониятлар очилмоқда
Жиззах вилоятининг Зафаробод туманида Республика Миграция агентлиги масъуллари, мактаб битирувчилари ва ишсиз ёшлар иштирокида очиқ мулоқот ўтказилди. Унда ёшларни хорижда қонуний ишга жойлаштириш, касбий тайёргарлигини ошириш ва меҳнат ҳуқуқларини ҳимоялаш масалалари муҳокама қилинди.
Бугунги ёшлар бандлигини таъминлаш давлат сиёсатининг устувор йўналишларидан биридир. Айниқса, хорижда ишлаш истагидаги фуқароларни қонуний меҳнат фаолиятига йўналтириш муҳим аҳамият касб этмоқда. Зеро, меҳнат миграцияси нафақат даромад манбаи, балки янги имкониятлар эшигидир. У инсоннинг касбий тажрибаси ва дунёқарашини кенгайтиришга ҳам хизмат қилади.
Бироқ хорижда ишлаш истагининг ўзи етарли эмас. Бунинг учун муайян касбий малака, хорижий тилларни билиш ва ҳуқуқий саводхонлик талаб этилади. Энг муҳими, ҳар бир фуқаро меҳнат шартномасининг шартларини яхши англаши зарур. Акс ҳолда, фирибгарлик ва меҳнат ҳуқуқлари бузилиши хавфи юзага келади.
Зафаробод туманидаги очиқ мулоқотда айнан шу масалаларга алоҳида эътибор қаратилди. Унда мактаб битирувчилари ва ишсиз ёшлар иштирок этди. Очиқ мулоқотда Миграция агентлиги, туман ҳокимлиги, корхона ва ташкилотлар раҳбарлари ёшлар билан юзма-юз суҳбатлашди.
Мутахассислар Германия ва Японияда меҳнат фаолиятини бошлаш имкониятлари ҳақида маълумот берди. Хорижий иш берувчилар талаблари, номзодларни танлаш мезонлари ва касбий тайёргарлик масалалари тушунтирилди. Айниқса, хорижий тиллар ва замонавий касбларни ўзлаштиришнинг аҳамияти таъкидланди.
Ёшларни махсус ўқув курсларида бепул тайёрлаш имкониятлари ҳам муҳокама қилинди. Бунда касб-ҳунар ва хорижий тилларни ўрганиш масалаларига алоҳида урғу берилди. Ҳужжатларни расмийлаштириш ва меҳнат шартномаларини тузиш тартиблари ҳам изоҳланди.
Бундай ташаббуслар давлатимизда ёшлар бандлигини таъминлашга қаратилган ислоҳотлар билан ҳамоҳангдир. Хусусан, Президентимизнинг 2026 йил 20 апрелдаги “Янги Ўзбекистон ёшлари – 2030” стратегиясини 2026-2027 йилларда амалга ошириш ҳамда ёшлар бандлигини таъминлаш бўйича қўшимча чора-тадбирлар тўғрисида”ги қарори муҳим ҳуқуқий асос ҳисобланади.
Мазкур қарорда хорижда ишлаш истагидаги ёшларни қонуний меҳнат миграциясига йўналтириш вазифалари ҳам белгиланган. Жумладан, унинг чора-тадбирлар дастурида ёшларни чет тилларига ўқитиш ва хорижда ишлашга мақсадли тайёрлаш назарда тутилган. Шунингдек, меҳнат миграцияси билан боғлиқ бюрократик тўсиқлар олиб ташланди. Қонуний меҳнат миграцияси орқали кетаётган ёшларни молиявий рағбатлантириш механизмлари ҳам кўзда тутилган.
Зафарободдаги очиқ мулоқот мазкур вазифаларни аҳолига етказиш ва ёшларни тайёрлашга хизмат қилади. Айниқса, мутахассислар билан бевосита мулоқот қилиш ёшларга тўғри қарор қабул қилишда ёрдам беради.
Учрашув давомида хорижда фуқароларнинг ҳуқуқ ва манфаатларини ҳимоялаш масалалари ҳам муҳокама қилинди. Ёшлар ўзларини қизиқтирган саволларга мутахассислардан жавоб олди. Билдирилган таклифлар асосида касбга йўналтириш ва бандлик масалалари юзасидан фикр алмашилди.
Аслида, қонуний меҳнат миграциясининг самараси хорижга юборилган фуқаролар сони билан чекланмайди. Уларнинг хавфсизлиги, муносиб меҳнат шароити ва ҳуқуқий ҳимояси ҳам муҳим мезондир. Шу боис ёшларни касбга тайёрлаш ва ишончли иш берувчилар билан боғлаш долзарб вазифадир.
Зафарободдаги учрашув ҳам ана шу мақсадларга хизмат қилади. Зеро, билимли, малакали ва ҳуқуқларини яхши биладиган ёшлар меҳнат бозорида рақобатбардош бўлади.
Абдужалол Қаюмов, ЎзА мухбири
