Олий Мажлис Қонунчилик палатасидаги Ўзбекистон "Миллий тикланиш" демократик партияси фракциясининг навбатдаги йиғилишида “Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун лойиҳаси биринчи ўқишда кўриб чиқилди.

Қайд этилганидек, ушбу қонун лойиҳаси билан узлуксиз 90 кун ва ундан ортиқ муддатда чет элда бўлиб қайтган 18 ёшдан 60 ёшгача бўлган Ўзбекистон фуқаролари, шунингдек, меҳнат фаолиятини амалга ошириш учун мамлакатимизга кириб келаётган хорижликларни мажбурий ОИВ текширувидан ўтказиш тартиби белгиланмоқда.

Маълумотларга кўра, ўтган йили хорижда бўлиб қайтган 1,7 млн. фуқаронинг 434 минги, яъни 25 фоизи ихтиёрий ОИВ/ОИТС текширувидан ўтган ва уларнинг 1 минг 512 нафарида ушбу касаллик аниқланган. Қонунчиликда бу борада мажбурий тиббий кўрик бўлмагани учун аксарият фуқаролар текширувдан ўтмаяпти.  

Муҳокамаларда депутатлар нима учун айнан 90 кун белгиланаётгани билан қизиқдилар. Қонун ташаббускорлари бу юқумли касаллик инсон организмида 90 кундан сўнг ўзини намоён қилишини қайд этди. Энг асосийси, чет элдан қайтган фуқаро агар ўзининг, оиласининг соғлигини ўйласа, тезда тиббий кўрикдан ўтиши лозим.  

Таъкидланганидек, узлуксиз тўқсон кун ва ундан ортиқ муддат давомида чет элда бўлиб қайтган Ўзбекистон Республикаси фуқаролари ва Ўзбекистон Республикасида доимий яшайдиган фуқаролиги бўлмаган шахслар ОИВга мажбурий тиббий текширувдан Давлат бюджети маблағлари ҳисобидан ўтадилар. Меҳнат фаолиятини амалга ошириш учун Ўзбекистон Республикасига кириб келаётган чет эл фуқаролари ва фуқаролиги бўлмаган шахслар ҳамда Ўзбекистон Республикасида доимий яшайдиган чет эл фуқаролари эса ўз маблағлари, иш берувчининг ёки қонунчиликда тақиқланмаган бошқа маблағлар ҳисобидан мажбурий тиббий текширувдан ўтказилиши белгиланмоқда.

Мазкур чоралар инсон саломатлиги учун хавф туғдирувчи юқумли касалликлар тарқалишининг олдини олиш, аҳоли саломатлигини муҳофаза этишга хизмат қилади.  

Муҳтарама Комилова, ЎзА