Темир йўл мамлакат тараққиёти учун муҳим объект ҳисобланади. Юртимизда барча жабҳаларда бўлгани каби айни соҳада ҳам ижобий натижаларга эришилмоқда. Жумладан, янгидан-янги электропоездлар, замонавий турдаги йўловчи вагонлари харид қилиниб, кўркам дизайндаги темир йўл вокзаллари барпо этилмоқда.
Бугунги кунда соҳа йўналишида «Бухоро-Урганч-Хива» темир йўли электрлаштирилиб, 960 километрлик ҳимоя тўсиқлари ўрнатилди ва сунъий иншоотлар қурилди.
Бу йўловчи ташишни йилига 3 миллиондан зиёд, юк поездлари ўтказувчанлигини эса қарийб 6 миллион тоннага ошириш имконини беради. Амалда эса йўловчи ташиш йилига 500 минг нафар, юк поездлари ўтказувчанлиги эса 1 миллион тоннадан зиёдроқ эди.
Мазкур йўналишга Кореянинг «Хюндай Ротем» компаниясидан юқори тезликдаги 6 та электропоезд олиб келиниб, келгуси йилдан «Жалолиддин Мангуберди» номи остида Тошкент-Хива йўналишига қўйилади.
Натижада Тошкентдан Хивага 14 соатда етиб борадиган поезд мазкур йўналишда ҳаракатга қўйиладиган электропоезд имкониятлари туфайли 7 соат 40 дақиқада етиб боради.
Давлатимиз раҳбари Хоразмга ташриф асносида янги ташкил қилинган замонавий йўловчи вагонларини кўздан кечирди.
— Президентимизнинг 2023 йил 10 октябрдаги «Ўзбекистон Республикаси темир йўл транспорти соҳасини тубдан ислоҳ қилиш чора-тадбирлари тўғрисида»ги қарори асосида янгича дизайн ва услубдаги барча қулайликларга эга замонавий йўловчи вагонларини харид қилиш учун Тикланиш ва тараққиёт ҳамда Саноатни ривожлантириш жамғармаси томонидан 150 миллион доллар имтиёзли кредит ажратилди, — дейди "O'ztemiryoo‘lyo‘lovchi" АЖ бош директори ўринбосари Фозил Зарипов. — Шундан 50 миллион доллари йўловчи вагонлари ишлаб чиқариш учун йўналтирилган. Жорий йилнинг биринчи чорагида эса дастлабки 10 та йўловчи вагони қуриб битказилди. Вагонлар 4 та плацкарт — ҳар бири 54 та ўринга мўлжалланган, 4 та купе — ҳар бири 36 та ўринга мўлжалланган. Шунингдек, 2 та СВ — ҳар бири 18 та ўринга мўлжалланган вагонлардир. Янги ташкил қилинган вагонлар бир вақтнинг ўзида қўшимча 400 нафарга яқин йўловчини қулай шароитларда манзилига етказиш имкониятини яратмоқда.
Дарҳақиқат, йўлга қўйилган вагонлар кондиционерлар, беоҳожатхоналар ҳамда ҳаракатлантириш имкони бўлган ўриндиқлар билан таъминлангани алоҳида эътиборга лойиқ.
<iframe width="650" height="420" src="https://www.youtube.com/embed/SICNvkYUEn4" title="Xorazmda tashkil etilgan zamonaviy yo`lovchi vagonlari barchani mamnun qilmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Абдулазиз РУСТАМОВ, ЎзА