Арманистоннинг Ереван шаҳрида хоккей бўйича катталар ўртасидаги жаҳон чемпионатининг IV дивизион беллашувлари ўз якунига етди. Унда Ўзбекистон терма жамоаси гуруҳда биринчи ўринни эгаллаб, мамлакатимиз хоккейи тарихида илк бора III “B” дивизионга йўл олди.

Ўзбекистон хоккей терма жамоаси жаҳон чемпионатининг IV дивизионининг сўнгги тур доирасида Малайзияга қарши музга чиқди ва 18:3 ҳисобида зафар қучди. Ушбу ўйин якунига кўра, терма жамоамиз очколари сонини 13 тага етказиб олди ва ўз гуруҳида биринчи ўриндан жой олди. Энди хоккейчиларимиз 2026 йилги мавсумда жаҳон чемпионатининг III “B” дивизионида иштирок этади.

Дарвоқе, чемпионат якунида дарвозабонимиз Рустам Иргашев жамоамиз таркибидаги энг яхши хоккейчи деб тан олинди.

Маълумот ўрнида: жаҳон чемпионатининг IV дивизионининг бешинчи тур якунига кўра, Ўзбекистон 13 очко билан пешқам бўлган бўлса, Арманистон 12 очкога эга бўлиб, иккинчи ўриндан жой олди. Кувайт  11 очко жамғариб, кучли учликни якунлади. Шунингдек, Индонезия 6, Эрон 3 очкони қўлга киритиб, 4-5 поғонада қолди. Малайзиялик хоккейчилар бирорта очкони қўлга кирита олмади ва гуруҳни аутсайдер сифатида якунлади.

Жавоҳир Тошхўжаев, ЎзА