Хитойнинг крикет жамоаси Ўзбекистонда машғулот ўтказади

Мамлакатимизда Олимпия спорт тури саналган крикетни оммалаштириш, уни ривожлантириш ҳамда хорижий мамлакатлар билан алоқаларни мустаҳкамлаш борасидаги амалий ишлар давом этмоқда.

Хитойнинг Чунцин шаҳрида Ўзбекистон крикет федерацияси раиси Азиз Михлиев Хитой крикет ассоциацияси вакиллари билан учрашди. Мулоқот давомида икки мамлакат ўртасида крикет спорт турини ривожлантириш, ҳамкорликни мустаҳкамлаш ва тажриба алмашинувини йўлга қўйиш масалалари муҳокама қилинди.

Учрашувда икки мамлакат крикет жамоалари ўртасидаги амалий ҳамкорликни кенгайтиришга қаратилган қатор истиқболли ташаббуслар илгари сурилди.

Жумладан, хитойлик крикетчиларнинг Ўзбекистон жамоалари билан қўшма ўқув-машғулот йиғинларини ўтказиши, ўртоқлик учрашувлари ҳамда турли спорт мусобақаларини ташкил этиш юзасидан келишувларга эришилди.

Самимий ўтган мулоқот жараёнида икки мамлакат крикет жамоалари ўртасидаги алоқаларни янада мустаҳкамлаш, спортчиларнинг маҳорати ва тажрибасини ошириш, крикетни ёшлар ўртасида кенг тарғиб этиш учун янги имкониятлар яратилаётгани таъкидланди.

Т.Рўзиев,

ЎзА