Хитой можарони тугатиш учун Эроннинг бойитилган уранини сақлашга тайёр
Ҳолатдан хабардор дипломатнинг сўзларига кўра, Хитой можарони дипломатик йўл билан ҳал қилиш саъй-ҳаракати доирасида Эроннинг бойитилган уранини сақлаш ёки қайта ишлашга тайёрлигини билдирди, деб ёзди “Ассошиэйтед Пресс” агентлиги.
Манба келишув тахминан 440 кг юқори даражада бойитилган уран Хитойга ўтказилишини назарда тутишига эътибор қаратган. Пекин материални сақлаш учун ҳудудига ташиб келтириш ёки “downblending” – бойитиш жараёнини энергиядан фуқаролик мақсадида фойдаланиш учун мос даражагача тушириш масаласини кўриб чиқяпти.
Хуллас, Эроннинг асосий савдо ҳамкори – ХХР Вашингтон талаби ва Теҳроннинг қараши ўртасида муросага олиб келиши мумкин бўлган муқобил йўлни таклиф қилмоқда.
Шунга ўхшаш амалиёт 2015 йил Қўшма Ҳаракат режаси доирасида қўлланган. Ўшанда Эрон ядровий келишув шартига риоя қилиш учун Россияга тахминан 11 тонна кам бойитилган уран экспорт қилган.
С.Раҳимов, ЎзА
