“Hindustan Times”: Ҳиндистон Ўзбекистоннинг спорт сиёсатидан нимани ўрганиши лозим?

Деҳлининг нуфузли “Hindustan Times” нашрида “Ҳиндистон Ўзбекистондан нимани ўрганиши мумкин?" сарлавҳали таҳлилий мақола эълон қилиниб, унда юртимизнинг спорт соҳасида босқичма-босқич эришаётган ютуқлари Ҳиндистон учун муҳим тажриба сифатида баҳоланган.

Нашрда қайд этилишича, диёримизнинг илк бор футбол бўйича жаҳон чемпионатига йўл олиши нафақат спорт ютуғи, балки давлат даражасида узоқ муддатли стратегия самараси ҳисобланади. Муаллиф фикрича, Ўзбекистоннинг мазкур натижага эришишида ҳукуматнинг изчил сиёсати ҳал қилувчи аҳамият касб этган.

Шунингдек, мақолада ўлкамиз эркаклар ўртасидаги футбол бўйича жаҳон чемпионатида иштирок этаётган Марказий Осиёдаги илк давлат сифатида тарихга кирганлиги баён этилган.

Муаллиф хулосасига кўра, Ўзбекистон тажрибаси Ҳиндистон учун муҳим сабоқ бўла олади. Айниқса, футбол инфратузилмасига сармоя киритиш, ёшлар академияларини ривожлантириш ва давлат қўлловини кучайтириш каби омил халқаро майдонда юқори натижага эришишнинг асосий шарти сифатида кўрсатилган.

Д.Ҳакимов, ЎзА