Аввал хабар қилганимиздек, Фарғонада кеча I-Халқаро китобхонлик фестивалининг очилиши бўлиб ўтди. Бугун эса “Central Asia – 2025: фан, таълим, маданият ва бизнесда интернет ва ахборот-кутубхона ресурслари” XVIII халқаро конференцияси ўз ишини бошлади.

Фарғона вилоят ҳокими фестиваль ва конференция ишида иштирок этар экан, вилоятнинг 4 та шаҳар ва туманида ахборот-кутубхона марказлари янгидан қурилгани, Аҳмад ал-Фарғоний номли вилоят ахборот-кутубхона маркази эса шу йили қайта қурилиб фойдаланишга топширилгани, ҳар шанба вилоятда “Китобхонлик куни” деб эълон қилинганини айтди. Фестиваль ва конференция қатнашчилари Фарғонада китобни севишлари ва китобхонлик даражаси юқори эканини қайд этдилар.

Ўзбекистон Республикаси Президенти ҳузуридаги Ахборот ва оммавий коммуникациялар агентлиги директори Асаджон Хўжаев “Central Asia – 2025: фан, таълим, маданият ва бизнесда интернет ва ахборот-кутубхона ресурслари” XVIII халқаро конференциясида Фарғона вилояти ҳокими Хайрулло Бозоровни кутубхоначилик ишига қўшган улкан ҳиссаси учун “Ахборот-кутубхона аълочиси” кўкрак нишони билан тақдирлади.

Хайрулло Бозоров бундай мукофот билан вилоят ҳокимлари ичида биринчи бўлиб тақдирланди.

Муҳаммаджон Обидов, Муқимжон Қодиров (сурат),

ЎзА мухбирлари