Халқаро рейтинг ва индексларда Ўзбекистоннинг ўрни тобора яхшиланмоқда
Халқаро рейтинг ва индекслар билан ишлаш бўйича республика кенгашининг навбатдаги йиғилиши бўлиб ўтди.
Сенат Раиси, Халқаро рейтинг ва индекслар билан ишлаш бўйича республика кенгаши раиси Танзила Норбоева бошқарган йиғилишда мамлакатимизда олиб борилган ислоҳотлар натижасида қатор халқаро рейтинг ва индексларда Ўзбекистоннинг ўрни яхшиланётгани таъкидланди.
Жорий йилнинг ўтган даврида “Fitch Ratings” ва “S&P” агентликлари Ўзбекистоннинг суверен кредит рейтинги кутилмасини “барқарор”дан “ижобий”га оширди. “Moody’s” агентлиги республиканинг кредит рейтинги баҳосини “Ва3” “ижобий” кутилмадан 1 поғона юқорига “Ва2” “барқарор”га кўтарди.
Иқтисодий эркинлик индексида Ўзбекистон 14 поғонага юқорилаб, 184 давлат орасида 86-ўринни эгаллади. Республикамиз 60,3 балл билан биринчи маротаба “ўртача эркин” (“moderately free”) давлатлар қаторига кирди. Олдинги йилларда “асосан эркин бўлмаган” давлатлар қаторида бўлган.
“Аёллар, бизнес ва қонун” индексида Ўзбекистон 43 поғонага юқорилаб, 190 давлат орасида 48-ўринни эгаллади. Ўзбекистон гендер тенглик соҳасида энг катта натижаларга эришган муҳим ҳуқуқий ислоҳотларни амалга оширган давлатлар қаторига киритилиб, аёлларнинг иқтисодий фаолиятини қўллаб-қувватлаш йўналишида топ-5 (Марказий Осиёда биринчи, Европада учинчи) давлатлар қаторидан ўрин олди.
Йиғилишда ислоҳотлардан келиб чиқиб, янги устувор халқаро рейтинглар билан ишлаш зарурати юзага келаётганлиги таъкидланди.
Сунъий интеллект соҳасини изчил ривожлантириш, рақамли технологияларни кенг жорий этиш ҳамда халқаро тавсиялар асосида мамлакатимизнинг ушбу йўналишдаги позицияларини мустаҳкамлаш муҳим аҳамият касб этмоқда. Бу борада “Oxford Insights” халқаро ташкилотининг Ҳукуматнинг сунъий интеллектга тайёргарлик индекси юритилиши бошлангандан (2020 йилдан) бери кўрсаткичлар 33 поғонага яхшиланган (2025 йилда 62-ўрин, 2020 йилда 95-ўрин) ва Ўзбекистон МДҲда энг юқори натижага эришган мамлакатга айланган.
Атроф-муҳитни муҳофаза қилиш самарадорлигини ошириш, экологик барқарорликни таъминлаш ҳамда халқаро ташкилотлар тавсиялари асосида экологик сиёсатни янада такомиллаштириш зарурлигига эътибор қаратилди. Жумладан, АҚШнинг Йель Университети ҳамда Колумбия университети томонидан юритиладиган Атроф-муҳит самарадорлиги индексида 2026 йилда Ўзбекистон 177 давлат орасида 121-ўринни эгаллаган (2024 йилда 107-ўрин эди).
Мазкур индексларни устувор халқаро рейтинглар қаторига киритиб, тизимли ишларни олиб бориш тавсия этилди.
Мажлисда мамлакатимизнинг ижтимоий-иқтисодий ва сиёсий-ҳуқуқий соҳага оид устувор халқаро рейтинглардаги ўрнини яхшилаш бўйича 2026 йилга мўлжалланган чора-тадбирлар режаси ижроси ҳолати кўриб чиқилди.
Муҳокама якунида Ўзбекистон учун устувор аҳамиятга эга халқаро рейтинг ва индексларда мамлакатимиз позициясини янада яхшилаш бўйича қўшимча чора-тадбирлар ишлаб чиқиш вазифалари белгиланди ҳамда Республика кенгашининг тегишли қарори қабул қилинди.
Н.Абдураимова, ЎзА
