ГФР ташқи ишлар вазири Йоханн Вадефуль яқинда шов-шувга сабаб бўлган баёнот билан чиқди. Унинг таъкидлашича, Россиянинг Украинадаги ҳарбий ҳаракатлари фақат Хитой томонидан кўрсатилаётган ёрдам туфайли давом этмоқда.

– Хитой ушбу низода бетарафлигини намоён этаётгандек кўринса-да, аслида РФга санкцияларни четлаб ўтишда, технологиялар етказиб беришда ва иқтисодий барқарорликни таъминлашда кўмаклашмоқда, -деди вазир.

Вадефуль Японияга қилган сафари чоғида ҳам Хитойга нисбатан танқидий позициясини очиқ баён этди. 

– Россия – Украина зиддияти мана тўртинчи йилдирки давом этаётир, -деди у Япония ташқи ишлар вазири Такэси Ивая билан учрашувдан сўнг. – Можаронинг бунчалик узоқ давом этиши ХХРнинг кўзга кўринмас, лекин таъсирли ёрдами сабабидир. 

Германиялик вазир шу сабабли Европа Иттифоқининг Хитой билан муносабатларини қайта кўриб чиқишга чақирди.

Унинг сўзларига кўра, Хитойнинг Россияни геосиёсий ва иқтисодий фронтларда қўллаб-қувватлаши глобал хавф омилига айланган.

Вадефулнинг ушбу баёноти Пекинда кескин норозилик уйғотди. Хитой ташқи ишлар вазирлиги расмий вакили Мао Нин унинг гапларини “асоссиз ва провокацион” деб баҳолади. 

– Биз барча томонларни тинчлик ва барқарорлик манфаатларини ҳимоя қилишга, можарони авж олдирмасликка ва мулоқот орқали ҳал этишга чақирамиз. Германиянинг баёнотлари минтақавий барқарорликка таҳдид солади, -деди Мао Нин.

У шунингдек, Германияни дипломатик этикет доирасида қолишга ва Хитойнинг ички ҳамда ташқи сиёсатига нисбатан холис муносабатда бўлишга чақирди. 

Хуллас, Хитойнинг Россия билан яқин муносабатлари Ғарб давлатларида минтақавий хавф сифатида кўрилмоқда. Шунингдек, Вадефулнинг бундай чиқишлари Ғарб давлатлари томонидан Хитойга нисбатан сиёсий ёндашувни қайта кўриб чиқиш ва бирдам ҳаракат қилишга қаратилган дипломатик ташаббус сифатида баҳоланмоқда.

<iframe width="640" height="420" src="https://www.youtube.com/embed/RZygozdiWGI" title="Germaniya tashqi ishlar vazirining bayonoti shov-shuvga sabab bo‘ldi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К.Бекжонов, ЎзА