“GEOMIN AI Labs 2026”: энг яхши сунъий интеллект лойиҳалари аниқланди
Бугун Тошкентда “GEOMIN AI Labs 2026” хакатонининг финал босқичи бўлиб ўтди.
Тадбир тоғ-кон саноати ва геология соҳасидаги амалий масалаларни ҳал этишда маълумотлар таҳлили (Data Science) ҳамда сунъий интеллект технологияларидан фойдаланишга бағишланди.
Тоғ-кон саноати ва геология вазирлиги ҳамда Халқаро геофизиклар жамияти (SEG) кўмагида ташкил этиладиган “GEOMIN-2026” халқаро конференцияси доирасида ўтказилган хакатонга “SLB” компанияси технологик ҳамкорлик қилди.
Хакатон бир неча босқичда ўтказилиб, унда Ўзбекистонда таҳсил олаётган 60 дан ортиқ талаба ва ёш мутахассис иштирок этди. Саралаш босқичидан сўнг 10 нафар финалчи ўз лойиҳаларини экспертлардан иборат ҳакамлар ҳайъатига тақдим қилди.
Иштирокчилар тўртта амалий вазифа бўйича иш олиб борди. Жумладан, истиқболли рух конларини аниқлаш, олтин миқдорини башорат қилиш, геотермал энергетика учун ер ости ҳароратини баҳолаш ҳамда тоғ-кон саноатида экологик хавфларни камайтиришда машинавий ўқитиш усулларидан фойдаланиш бўйича ечимлар ишлаб чиқилди.
Финал босқичида иштирокчилар ўз моделлари ва тадқиқот натижаларини тақдим этиб, ишланмаларни амалиётда қўллаш имкониятларини намойиш қилди.
Ҳакамлар ҳайъати қарорига кўра, Геология фанлари университети талабаси Зиёда Минаварова биринчи ўринни эгаллади. “MISiS” миллий тадқиқот технологик университетининг Олмалиқ филиали талабаси Диёрa Каримова иккинчи, Олмалиқ давлат техника институти талабаси Темирали Содиқов эса учинчи ўринни қўлга киритди.
–Мазкур тадбирда иштирок этиш мен учун янги имкониятлар эшигини очди. Хакатон давомида ўз билим ва кўникмаларимни амалиётда синаб кўриш, соҳадаги мутахассислар билан фикр алмашиш ҳамда янги ёндашувлар билан танишиш имконига эга бўлдим. Турли лойиҳалар устида ишлаш жараёнида орттирган кўникмаларим касбий фаолиятимда асқотишига ишонаман.
Биринчи ўринни қўлга киритиш эса ўз устимда янада кўпроқ ишлашга ундайди. Бу натижа янги лойиҳаларга қўл уриш ва касбий салоҳиятимни оширишга бўлган қизиқишимни янада кучайтирди. Айниқса, “SLB” компаниясида стажировка ўташ имконияти соҳадаги амалий жараёнлар билан яқиндан танишиш ва профессионал муҳитда янги кўникмаларни шакллантириш учун муҳим қадамдир.
Келгусида “Data Science” ва сунъий интеллект бўйича билимларимни чуқурлаштириб, улардан геология ва тоғ-кон саноатидаги амалий масалаларни ҳал этишда самарали фойдаланишга ҳаракат қиламан, – деди З. Минаварова.
Биринчи ва иккинчи ўрин соҳибларига “SLB” компаниясида ҳақ тўланадиган стажировкадан ўтиш имконияти берилди. Улар “Data Science”, сунъий интеллект ва рақамли технологиялардан фойдаланган ҳолда соҳанинг амалий вазифаларини ҳал этиш жараёнида иштирок этади.
Уч нафар совриндор “GEOMIN 2026” халқаро конференциясига чипталар билан, финалчилар эса эсдалик совғалари билан тақдирланди.
Насиба Зиёдуллаева, ЎзА
