Ғарбий Болқоннинг Европа орзуси яна кун тартибида
Европа Кенгаши президенти Антониу Кошта бугун Сараеводан бошланадиган бир ҳафталик Ғарбий Болқон сафарига киришди. У Босния ва Герцеговинадан ташқари минтақанинг яна беш давлатига ташриф буюриб, сафарни жума куни Черногориянинг Тиват шаҳрида ўтадиган Европа Иттифоқи - Ғарбий Болқон саммити билан якунлайди.
Брюсселдаги расмийлар ушбу ташрифни минтақа учун муҳим сиёсий сигнал сифатида баҳоламоқда. Уларнинг фикрича, Ғарбий Болқон давлатларининг ЕИга қўшилиши қитъа хавфсизлиги ва барқарорлиги учун стратегик аҳамиятга эга.
Минтақадаги олти давлатдан бештаси расман аъзоликка номзод мақомига эга. Фақат Косово ҳозирча эҳтимолий номзод. Интеграция жараёнида энг илғор давлат сифатида намоён бўлаётган Черногория эса айрим таҳлилчилар томонидан жорий йил охиригача иттифоққа қўшилиши тахмин қилинган.
Болқон давлатларининг аксари ЕИ эшиги олдида қарийб йигирма йилдан бери кутиб турибди. Шу боис Черногориянинг эҳтимолий аъзолиги бутун минтақа учун тарихий бурилиш нуқтаси сифатида баҳоланмоқда.
Шу билан бирга ЕИнинг кенгайиш сиёсатига Украина масаласи ҳам таъсир кўрсатмоқда. Киев урушдан кейинги хавфсизлик кафолати сифатида тезлаштирилган аъзоликни талаб қилмоқда. Брюсселда эса айни масала турли баҳсларни туғдириб, ягона ёндашув ҳозирча шакллангани йўқ.
Бу орада Руминияда Россиянинг “Геран-2” дрони турар жой биносига келиб тушиши ортидан хавотир сақланиб қолмоқда. Мамлакат Президенти Никушор Дан ҳодиса учун Москва масъул эканини таъкидлади.
Ҳафта охирида яна бир неча муҳим воқеа юз берди. Парижда “Пари Сен-Жермен”нинг Чемпионлар лигасидаги ғалабаси ортидан юз берган тартибсизликда юзлаб одам қўлга олинди. Президент Эммануэль Макрон зўравонлик ҳолатини мутлақо қабул қилиб бўлмайдиган ҳолат, деб атади.
Шунингдек, Исроил қўшини Ливан ҳудудидаги тарихий Бофор қалъаси назоратга олинганини маълум қилди. Бу сўнгги 26 йил ичидаги энг чуқур ҳарбий ишғол сифатида баҳоланмоқда. Париж эса бу масала юзасидан БМТ Хавфсизлик Кенгаши шошилинч йиғилишини чақириш талаби билан чиқди.
Мусулмон Зиё, ЎзА
