Францияда талончилик: заргарлик фабрикасидан қарийб 50 килограмм олтин ўғирланди
Номаълум шахслар Франциянинг Безансон шаҳридаги заргарлик фабрикасида қуролли талончилик уюштириб, қарийб 50 килограмм олтин ва бошқа заргарлик буюмларини ўғирлаб кетишди, деб хабар тарқатди “Franceinfo” телеканали.
Таъкидланишича, эгнига зирҳли нимча кийган ва юзларини яшириб олган беш нафар босқинчи завод ҳудудига эрталабки вақтда бостириб киришган. Жиноятчилар қўлларидаги қуроллар билан ишчиларни қўрқитиш мақсадида ҳавога бир неча марта ўқ узишган.
Қочиш пайтида ўғрилар йўлга атайлаб михларни сочиб юборишган, натижада полиция машинаси ва мотоцикл шиналари тешилган. Қочиб кетган машина кейинчалик ёқиб юборилган ҳолда топилган.
Воқеа пайти завод ишчиларидан бири жароҳат олгани айтилмоқда. Талончилик бўйича тергов ишлари бошланган.
С.Раҳимов, ЎзА
