Францияда намойишчилар 10 000 еврогача товон тўлайди
Франция Сенати намойиш пайти етказилган зарар учун иштирокчилардан 10 000 еврогача товон ундиришни назарда тутувчи қонун лойиҳасини маъқуллади. Ушбу ҳужжат энди сиёсий қарама-қаршилик кучайган Миллий ассамблеяда муҳокама қилиниши ва овозга қўйилади.
Сенат лойиҳанинг кенгайтирилган нусхасини 229 овоз билан қўллаб-қувватлади, 105 сенатор қарши чиқди. Мазкур ташаббус май ойида “Пари Сен-Жермен” клубининг Чемпионлар лигаси финалидаги ғалабасидан кейин Парижда юз берган тартибсизлик ортидан илгари сурилган. 17 октябрь куни тенгсизлик ва нарх кўтарилишига қарши намойиш зўравонликка айланиб, минглаб савдо нуқталари зиён кўргани, талон-тарож қилингани ҳақида хабар берилган. Ички ишлар вазири Лоран Нуньес парламентда тартибсизлик оқибатига жавоб бериш “шошилинч зарурат” эканини таъкидлаган.
Таклиф танқидга ҳам сабаб бўлмоқда. Қаршилар шахсан зарар етказмаган одамлар ҳам вандализм учун тузилган гуруҳда эканини била туриб қатнашгани аниқланса, молиявий жавобгарликка тортилиши мумкинлигидан хавотирда. Лойиҳа зарарни қоплаш учун ижтимоий нафақа ва уй-жой ёрдамини ҳам ундиришга рухсат беради. “Amnesty International” бу чоралар аввалдан ижтимоий жиҳатдан заиф оилаларни янада қашшоқлаштиришидан огоҳлантирди. Италияда ҳам зўравон намойишлар ташкил этган гуруҳларга нисбатан 4 йилдан 12 йилгача қамоқ жазосини назарда тутувчи хавфсизлик чораси жорий этилган.
Мусулмон Зиё, ЎзА
