Франция ўрмонларида ёнғинлар авж олди
Париждан тахминан 60 километр жануби-шарқда жойлашган машҳур Фонтенбло ўрмонида бир ҳафтадан буён давом этаётган кучли ёнғинни ўчиришга 500 дан ортиқ инсон сафарбар этилган.
Мамлакат ички ишлар вазири Лоран Нуньеснинг маълум қилишича, 13 июль оқшомига қадар “тилсиз ёв” 1300 гектардан зиёд майдонни ўз домига тортиб улгурган. Асосий олов манбасидан беш километр узоқликда иккинчи бир ёнғин ўчоғи юзага келиб, у ҳам тез фурсатда 100 гектардан ортиқ жойга тарқалган.
“France 24” аланга аллақачон ўрмон умумий майдонининг тахминан 5 фоизини куйдириб юборганини ёзмоқда. Ўтган якшанбада бошланган ушбу офатга қарши курашга кучли шамол ва тупроқнинг торфли (чириндили) эканлиги жиддий тўсқинлик қилмоқда.
Маҳаллий ҳукумат хавфсизлик нуқтаи назаридан яқин атрофдаги аҳоли пунктларидан одамларни хавфсиз жойларга кўчиришни бошлаган, шунингдек, ҳудуддаги бир нечта автомобиль йўллари ёпилиб, темир йўл қатнови вақтинча тўхтатилган.
Ҳодиса юзасидан олиб борилаётган суриштирувлар давомида ўрмонга қасддан ўт қўйишда гумонланган икки нафар шахс қўлга олинган.
Ф.Яхшибоева, ЎзА
