АҚШнинг Бостон шаҳрида фигурали учиш бўйича катталар ўртасидаги жаҳон чемпионатининг жуфтлик йўналишида Ўзбекистон терма жамоаси аъзолари Екатерина Гейниш ва Дмитрий Чигирёв ўз омадини синаб кўрмоқда.

Ушбу тандем чемпионатнинг қисқа дастурида 23 жуфтлик орасидаги илк тўртлик гуруҳида иштирок этди. Спортчиларимиз мазкур рақобатда Кийоши Ёшида томонидан ижро этилган “Deal with Soul Madam” қўшиғига чиқиш қилди ва 62.33 балл жамғарди. Қисқа дастурда япониялик Рику Миура ва Рюичи Киҳара жуфтлиги 76.57 балл билан биринчи бўлди.

Энди Екатерина Гейниш ва Дмитрий Чигирёвнинг мамлакатимиз вақти билан 27 мартдан 28 март кунига ўтар кечаси эркин дастурда чиқиш қилиши кутилмоқда. Ушбу йўналишда қисқа дастурдан ўтган 20 та жуфтлик қатнашади.

Жавоҳир Тошхўжаев, ЎзА